يابني يا غالي عليه
راح اقولك كام وصية 
حطهم جوه في عنيك 
ينفعوك في الدنيا ديه
اول وصية اوصيهالك
عيش في دنيتك غريب
خليك كدا عايش في حالك 
واوعي تعمل حاجه عيب 
كل واصرف من حلالك
واوعي عن ربك تغيب
هو بس عالم بحالك 
واقرب من اقرب قريب
اوعي تحسد اوعي تحقد
لو حد محتاجلك ما تبعد 
اوعي تستقوي في يوم 
اوعي تضعف لاء اصمد
خلي سرك ليك لوحدك 
واوعي تلعن يوم في بختك 
دي الدنيا رحلة وراح تزول
وخلي بالك م اللي ساندك
يابني اوفي بالعهود 
دا طبعنا من الجدود 
طول عمرنا محافظين عليه
وكل حد وله حدود 
اوعي يوم ياخدك غرورك
وتعيش في دور 
مش هو دورك 
لتنقلع كدا من جدورك
وتلاقي في الطريق سدود 
حافظ علي الكلمه وراعيها
لو حتي غالية اشتريها
وازرعها في القلب تلقيها
طارحه ليك اجمل ورود
يابني بوصيك بالغلابة 
وخلي بالك م الديابة
محنا عيشين وسط غابه
فيها الطيابة والجحود 
اوعي تبص لحق غيرك
لو حتي مال بيك الزمن 
صحي دايما فيك ضميرك
خليك امين وتؤتمن
وابعد عن اصحاب المصالح 
ولما تغلط انت صالح 
واعتذر متقلش عيب 
متبتش يوم وانت جارح 
وخلي بالك من لسانك
مهو دا سبب المصايب
جمل كلامك طول زمانك 
وهيبقي حصنك وانت غايب
يابني يا غالي عليه
هي دي اجمل وصيه 
افهمها وامشي عليها دايماً 
وصدقني دي اجمل هديه