انا والسوزوكى والاغانى
الاصدقاء الكرام،كما تعرفون جميعا ويعرف معظم افراد الشعب المصرى الهمام فانا اعيش فى قريه صغيره يفصلها عن المدينه حوالى ثلاثه كيلو مترات ،ووسيله المواصلات المستخدمه عندنا هى سيارات سوزوكى سبعه راكب،الى الان لا توجد مشكله والحياه جميله،يكفى ان لدينا وسيله مواصلات محترمه،
المشكله الكبيره هى كما يعرف معظم الساده افراد المجموعه ان معظم قائدى سيارات الاجره لهم ثقافه معينه بالنسبه لنوعيه الاغانى التى يسمعوها ولكن المشكله الاخطر من انعدام الذوق فى اختيار الاغانى(بالمناسبه انا لا اعتقد ان هناك اغانى محترمه واخرى غير محترمه فكل الاغانى عندى هلس ده راى وانا حر فيه)المشكله ان هذه السيارات يقود معظمها شباب صغير ومزاج عند هؤلاء انه يشغل المسجل ودلوقتى بقى سى دى يشغله على اعلى صوت ممكن زى ما يكون اللى فى العربيه طرش مبيسمعوش ،ولو مكنوش طرش فمن الؤكد انه سوف يصيبنا الصمم من هذه الظاهره المفزعه بالنسبه لى على الاقل، وبالطبع الاستاذ السواق لازم يمشى باقصى سرعه لزوم الروشنه ،
لحد كده وممكن الكثير منكم ممن يركبون وسائل المواصلات يقولى الحكايه دى موجوده فى كل مكان،
ماشى المشكله ان لما اقول للسواق لو سمحت هدى الصوت شويه او اقفل المسجل خالص طبعا الكلام ده مبيعجبش السواق ومن الممكن ان تحدث مشاده بينى وبين السواق سواء على السرعه او على الصوت العالى ،يقوم واحد من الساده الركاب الافاضل طبعا بحسن نيه ويقولى يا استاذ اهو بيسلى نفسه او واحد تانى يقول المسافه صغيره وهننزل ومش مستهاله ،انا مش فاهم هو انا غلط والا صح ،هى سيارات الاجره تسير تبعا للراكب ام تبعا لصاحب السياره ،هو الشعب المصرى الهمام بيدافع عن الغلط ليه وكل اللى يهمه انه يوصل بيته وخلاص،سواء كان واقف والا قاعد مزنوق والا مستريح(اقصد فى المواصلات)
يدفع الاجره المحدده ام يستغل  ويدفع اكثر فى اوقات الذروه،السواق يحترمه او لا ،المهم اروح البيت،
انا مش هقول فين شرطه المرور ولكن فين نخوه الشعب المصرى؟
تصدقوا ان مره سواق  حلف بالطلاق ان انا لازم انزل من العربيه،ليه؟لان سيادته بيعاكس واحده ماشيه فى الشارع ومش باصص للطريق وهنعمل حادثه،مش هحكى تفاصيل ولكن تصدقوا مين اللى كان بيدافع عن السواق او بيقوله معلش ياسطى واطلع بقى عاوز اوصل كان دكتور فى الجامعه،
انا اتسائل الى متى هذه السلبيه والروح الانهزاميه  والتطنيش ،وسياسه (وانا مالى)
ثم تاتى الطامه الكبرى واللى انا لازم اعمل مشكله ساعتها ،ان ان كثير من السواقين الغير محترمين  بالمره لما يحب يهزر مع واحد من اصحابه الهزار طبعا يكون بالشتيمه (على فكره ده معناه انهم اصحاب اوى)ومش اى شتيمه اقل ما توصف به انها جارحه للحياء،والمصيبه الاكبر لو معاك زوجتك او احد ابنائك وسمع الكلام ده وشاف سلبيتك، ورغم ذلك من النادر ان تجد من يردع او يتصدى لامثال هؤلاء،والمصيبه تانى ان تجد من يستعطفهم عشان يفض المشكله ونروح،
يا جدعان انا زهقت لدرجه انى فكرت اعمل جمعيه واشترى عربيه خاصه حتى لو عربيه كارو.
*********************************************************************شكله فى كلمات
1-الاغانى
2-السرعه
3-قله الادب من السواقين
4-السلبيه واللا مبالاه من الشعب المصرى الهمام
والسلام
**********
نعمان عاشور