كنت بشوفك
لما كان القلب بيشوفك
زي أميرة
بتلمع وسط سمايا حروفك
كنت بشوفك
وسط الضلمة أجمل نور
ماسكه بإيدي
وعدي بيكي مليون سور
عمر ماحس
القلب معاكي بأي متاعب
كنت في تشكيلة
منتخبك أفضل لاعب
عمري مافكرت بإحساسي
ولا إحساسك
أبقى في يوم لاعب مغمور
ديما بيكي بعدي الصعب
فارس ملكي خاض
على شانك كل معاركه
خان على شانك كل مبادئه
وعمرة ماجه على قلبه الدور
تخيلي إني
كنت بشوفك زي أميرة
وأنتي شيفاني طرطور
كنت بشوفك
زي ماقالوا
عنك ديما إنك سد
زي جدار
عالي لحسادك مابينهد
واقفه عنيده في وش عدوك
وإنك قاهرة موساد أعدائك
وإن بكلمة من حكامك
تقدري تحمي كل أخواتك
وإنك شوكه
في حلق الظالم
وإنك بطله في وقت الجد
تقدري تقفي.
وإن شجاعتك مالهاش حد
بس خساره
غيروا فيكي بعض مبادئك
مهما أبني وأعلي فيكي
دايما بلاقيني محظور
عيشتيني في ضلمة خوفك
رغم ملامحي قابله النور
وإن غريبك رغم بعاده
له جواكي ألف حضور !!
ليه دايما شيفاني صغير ؟؟؟
وأنا على شانك
أعدي بيكي مليون سور
كنت بشوفك ولسه هشوفك
كل الدنيا. ياأم الدنيا .
رغم إنك شيفاني مكسور.
.......
حمدي رمضان ابوعمرو الريشي
