يا بكره يا جاي
انا لسه مستني
اشوف الوطن فرحان
من فرحته بيغني
مليان عيدان فل
والكف متحني
الناس تشوف حرفي
ويصفقوا لفني
**********
يا بكره يا جاي
اوعاك تيجي متغمي
تنسى افراح الوطن
وتفتكر همي
دا الوطن هو ابويا
والوطن كمان امي
*************
يا بكره يا جاي
اوعى تجيب فرعون
زهقنا يا بكره والظلم ملعون
والعدل يا بكره أساس الكون
*************
يابكره يا جاي
اوعى التاريخ تنساه
تاريخنا دا عبره وكله عز وجاه
لو توهت يا بكره
أسأل حطين تلقاه
***********
يا بكره يا جاي
تعالى بكل جميل
نرتل القرأن
ونقرا في الإنجيل
محمد اخو عيسي
ومش محتاجين لدليل
****************
يا بكره يا جاي
قول مصر هي القيادة
طول عمرها يا بكره الريادة
وأسأل عين جالوت
واوعى كويس للشهادة
****************
يا بكره يا جاي
تعالى بالنصر
طول عمرنا بنحبك يا مصر
واوعاك من الصهاينة
طاعون العصر
************
يا بكره يا جاي
هات معاك انسان
بلاش تجيب صهيوني جبان
عمره يا بكره ما كان
اخويا ولا ابن عمي
***************
يا بكره يا جاي
هات معاك حرية
وحبة عدالة يا بكره منسيه
زهقنا يا بكره
كفاية حرامية
************
يا بكره يا جاي
بلاش تجيب فساد
عايزين شفافية
وبلاها أحقاد
لم بقى ولادنا
وكفاية حساد
************
يا بكره يا جاي
هات معاك ياسمين
حزينة يا بهية
راح جمالك فين
وحشانا يا بهية
عيونك الزين
***********
يا بكره يا جاي
كفاية احزان
فين العروبة فين
أصبحت اكفان
والمسلم يا بكره لأجئ ومتهان
كفايه يا بكره هم
كرهنا لون الدم.
عايزين بقى عمران
ناصر توفيق القاهرة
18/9/2017
