لسّه
أيوه فعلا قلبى عاجز
إنه يكسر كل حاجز
لسه مش قادر يجيلك
لسه تايه عن سبيلك
بس لسه القرب جايز
لسه بيحاول يشوفك
لسه بيترجم حروفك
بس خايف من كسوفك
تحرجيه وتقولى لأ
تجرحى قلبه اللى دق
أصله عاوز بس يعرف
هى إيه برضو ظروفك
لسه باكتب ليكِ همس
لسه بامسح لفظ يأس
لسه بَالْمَح جُواّ عينك
ضَىّ يغلب أى شمس
لسه عندى ألف فكره
هابنى بيها حب بكره
حب يبقى سد مانع
ضد أى قلب يكره
لسه فيه بينا كلام
لسه شوق بعده هيام
لسه فيه لحظة هاتجمع
بين قلوبنا فى الغرام
لسه فيه بينا حياه
فيه أمل راصدين خطاه
إن قلبى يلاقى قلبك
إنه يحكي له هواه
بقلم./ سيد عبدالوهاب
