نسيت انسى باني كنت منسية
وان القصة كات بينا
ضعيف النص مش مكتوب
دراما بدمع مروية
وزيف مصلوب
على كل البنات بتدوب
وعارفة بطلها بيمثل
وكام مشهد بيجمعهم
وقصة عشق وهمية
فتنهي مسلسل العشاق
ويضحك ضحكة مش هي
دموع بتبات بجفن العين
وقلب حزين
يعاني ف كل اغنية
بيسمعها
يلملم من الحنين نغمه
يقسمها كمانجة وناي
وقلبي السارح النساي
بقى رايح ومرة جاي
على شطي يفكر انه داواني
اتاريني ف قلب البعد مرمية
وياما كنت ليه بشتاق
ورغم الكدب جوة عيون
مليها حيرة العشاق
فارمي حمولي
واداري الوجع فيا
وطعم الملح ف كلامه
بقى مره يحليلي
اصايده العايمة ع المية
فالملم ف الحروف اللي
كتبها لغيري مش ليا
واجمعها .. فاعرف ليه
رماني وقالي عمري ما خنتك
مسيرك بكرة حتشوفي
بان الظلم من طبعك
فقلت خلاص نسيت انسى
فسيب ربي
حيحكم بينا يوم الدين
ولو مظلوم فحدعي لي
اكونلك م البنات الحور
نعيش نتهنى طول العمر
وتبقى لي
نعيمي ف جنة الرضوان
تراضيني
وتبقى م السما هدية
