الشاعر /رضا علي احمد ابو شنب

جمهورية مصر العربية

محافظة الدقهلية

مركز ميت غمر

قصيدتي الجديدة

( الشرطة في حضن الشعب) 

نفس الميعاد ومن زمان

والمكان جوه الميدان

كان شباب طاهر شريف

عمره ما يمسه الشيطان

كان ينادي بالرغيف

والعدالة والامان

كل همه كان بلاده

عمره مرة في يوم ماخان

كان شجاع ولا عمره باع

الوطن ولا كان جبان

كان بيحلم مصر تعلي

أو تكون زي اليابان

تبقى دايما مصر حرة

 صوتها يعلي بالاذان

والهلال يحضن صليب

والجميع يبقي في امان

المكان جوه الميدان

                        *********************

المكان جوه الميدان

رمز تحرير العباد

من الفساد واللي خان

واللي سارق في البلاد

واللي بيدمر بلاده

أو يضحي بالولاد

لو هيبقي الكل ضده

يبقى سايق في العناد

خلو لينا الدنيا ضلمة

والبياض اصبح سواد

والشباب وبكل همه

جم في لمه في الميعاد

جم وقامو بكل قوة

حررو لينا البلاد

فجرو جوانا ثورة

في الميدان كان الميلاد

                         *******************

وصلو من كل الاماكن

خرجو من جوه الحارات

اللي شافهم قال ياساتر

قفلو مترو السادات

الشباب جنب البنات

علو صوتهم في ثبات

مش هنمشي قبل منه

هو يمشي من سكات

مش هنخضع للسيادة

او نوطي علي البيادة

إما ننتظر الشهادة

او نجيب حق اللي مات

                               ******************

ثورة بيضة بقلب ابيض

اتهزم فيها الشيطان

والسفينة بترسي بينا

بعد ثورة من الطوفان

والشباب وبكل همه

نضفو ياالله الميدان

القرار اصبح قرارنا

مش وصاية امريكان

والمصير اصبح بايدنا

لما نور الشمس بان

اللي يجي ويعاندنا

خد نصيبه من الجنان

والتاريخ بايدين ولادنا

وانكتب جوه الميدان

                       **********************

طول تاريخنا شعب واحد

اتخلقنا علشان نعيش

في القلوب بتلاقي شرطه

جوه روحنا تلاقي جيش

لو في مرة يغيبو عنا

الامان يصبح مفيش

علي الحدود واقفين اسودنا

يحمو سينا والعريش

كلهم خايفين علينا

من المجند للشاويش

نبقي نايمين جوه بيتنا

وتلاقيهم جوه خيش

دول يحبو مصر جدا

مش مجرد اكل عيش

                              ****************

كلنا ولادك يا غالية

كل يوم جواكي عيد

كل يوم بنحيي فيكي

العلم ويا النشيد

والتحية العسكرية

من المجند والعميد

احنا فيكي سادة يامه

عمرنا منكون عبيد

نعلي بيكي كمان ونعلي

قلبنا زي الحديد

احنا بيكي احلي لمة

من السويس حتي الصعيد

لما بتضمينا ضمه

قلبنا بيكون سعيد

واتعاهدنا صليب ومدنه

نبدأ العهد الجديد

نرفع المجد في حدودنا

بيكي شمس الكون تقيد

كلنا فداكي يا بلدي

جوه منك مش بعيد

عمرنا ما نضحي بيكي

لو يموت مليون شهيد

لو يموت مليون شهيد

                                 *****************

المصدر: آسيا محمد
  • Currently 5/5 Stars.
  • 1 2 3 4 5
1 تصويتات / 16 مشاهدة
نشرت فى 16 يناير 2019 بواسطة nasamat7elfouad

عدد زيارات الموقع

32,091