منقول ...ولا تعليق...

التجربة:
الأسبوع الأول:
1. العلماء حطّوا 5 قرود جعانين في قفص مع سلّم وفوقه شوية موز.
2. كل ما أحد القرود يحاول يطلع للموز، العلماء يرشّوا مَيّه باردة زي التلج على ال 4 قرود التانيين.
3. فينقض ال 4 قرود بالضرب والعقاب على القرد المغامر ويبعدوه عن السلم بالعافية.
4. بطّلوا يحاولوا من خوفهم من: أ- العقاب الخارجي *الماء الزمهرير* ب-عقابهم لبعضهم *الضرب والشلاليت*.

الأسبوع التاني:
كَسَل وبلادة وعدم محاولة.

الأسبوع التالت:
5. العلماء استبدلوا أحد القرود العواجيز بقردة صغيرة.
6. بمجرد دخولها القفص طارت ناحية السلم.
7. اترقعت علقة ما خدهاش كلب في جامع ومن ساعتها حرّمت تهوّب ناحية السلم.

الأسبوع الرابع:
هدوء وكسل ووخم.
8. العلماء كرروا نفس التجربة واستبدلوا قرد آخر عجوز بقرد طازة شباب.
9. كالمتوقع شم ريحة الموز فَطار ع السلم.
10. الغير متوقَّع هو إن العلقة اللي أكلها القرد الجديد اشتركت فيها القردة الصغيرة.

الأسبوع الخامس:
11. كرروا الخطوة السابقة حتى تم استبدال الطقم القديم اللي حضر رش المية، بجيل جديد مكوّن من 5 قرود جدد ما اترشّش عليهم ميه خالص.
12. ومع ذلك مازال الموز فوق السلم تتطلّع إليه الأنظار في تقديس وإجلال ووجل وخوف واللي تسوّل له نفسه ويسأل عن السبب يتلطّش فوراً. وكُلّه مرعوب!

الاستنتاج:
13. فالعلماء بيقولوا دي أسهل وسيلة لصناعة الغباء.
لو عاوز تصمم جيل مطيع كالقطيع يبقى لازم تزرع فيهم الخوف من العقاب الخارجي والعقاب الداخلي بحيث يحرّموا يسألوا عن أشياء.

14. وبيقولوا لو سألت أحد القرود:
س. بتعملوا كده ليه جوابهم غالباً حيكون:
ج. لا ندري ولكن هكذا وجدنا آباءنا وأجدادنا.

15. والنسخة البشرية من التجربة لا تختلف كثيراً.
بحيث اللي بيستظرف ويستخف دمّه بيقولوا عليه "مزدري" أومسيء ويحبسوه في قفص لوحده بتهمة المساس بالثوابت الموروثة من آباءنا وأجدادنا، واللي هي Common Sense, يعني *معلومة بالضرورة*.