مقادير العجينة
300 جرام دقيق يعنى ازيد من الربع كيلو بخمسين جرام(3مجات)
كوباية وربع لبن حليب
معلقة كبيرة سكر
كيس خميرة فورية
رشة ملح
ربع كيلو زبدة(بدرجة حرارة الغرفة)
بالنسبة للحشو
انا حشيته جبنا بيضا ومربى وشيكولاته
ودهنت الوشت ببيضة وفانيليا
الطريقة
هنخلط المقادير الجافة مع بعض
بعد كده نحط اللبن شوية شوية ونعجن
هتحسى ان العجينة طرية ومتماسكة
وممكن لو كانت بتلصق تفكيها بشوية زيت
هتسيبيها تخمر فى الفرن لمدة ساعتين
هتطلعيها تفرديها
وتفرشيها بالزبدة
وتطبيقيها وتدخليها التلاجة
ومتنسيش تحطى ع الترابيزة دقيق
وبعد ماتطبقيها تحطى عليها دقيق لو كانت طرية زيادة
وهتفضلى طول اليوم تفرديها وتحطى زبدة وتدخليها التلاجة
يعنى تقريبا كل ساعة
خلاص عملتى كده حوالى 12 مرة
هتجيبيها تقسميها على كورتين
تفردى كل كورة على شكل مستطيل
وتقسميه من النص بالسكينة
وكل نص تعمليه على شكل مثلثات
وتحشيه وتلفيه
وتحطيه فى صينية مدهونة زبدة
وبعد كده تدهنى وشه بالبيض والفانيليا
وتدخيه الفرن على حرارة 125 لمدة تلت ساعة او ازيد حاجة بسيطة
وتطلعيه وتاكليه بالهنا والشفا
دلوقتى بقى هسيبكم مع الصور بالتفصيل



دى العجينة لما خمرت