مجلة عشاق الشعر(1)ممدوح حنفي .. نور القمـر .. بقلم / إبراهيم فهمى

نور القمـــــــــــر
َََََََََََ
راحل أنا عن كل شئ
شايل معايا فرحتى
واخد وعود
فوق الحدود
ألقاها نجمة فى سكّتى
بسمة أمل
طالعه فسيله من بطن الحجرْ
جايبه أمانى العمر 
لاجل تبدّد وحدتى
أنا قلت أهرب من خلال البحرْ
فى ايديا حلم كبير 
بينبض بالأملْ
طارح أمانى كتيره بالحب الكبيرْ
نظرة حنان من جوّه قلبْ
مليان عشانى ألف حبْ
بيقول لى شارك رحلتى
وانا من زمان الصبر بابحث عن طريق
حاجه ترجّعنى لدروب الحياه
وقابلتها صدفه
وكنت أنا عايش غريقْ
بستنّى شط أوصلّه من تعب السفرْ
كل الذنوب عندك يارب بتُغتَفرْ
وانا ليه محلْوَطْ بالبلايا من الصّغرْ؟
من كبوة أطلع واترمى
فى حفره تانيه من الضياعْ
دايماً صراعْ
دلوقت جى الفْرْح فى ايديه الأملْ
أرفض وأقول الجرح عندى م اندمل ؟
وايه العمل ؟
الصبر أصبح مستحيلْ
وجبال مخاوف م الفشلْ
ماعدش ينفع شد ف خيوط الوترْ
أنا قلبى مَلْ من الخطرْ
الحلم واقف منتظرْ
وايديه بتتمد بأملْ
وانا جاتنى فرصه من جديدْ
أصبح سعيدْ
إزاى أدوس الفرحه
وارفض نور القمرْ ؟
بقلم / إبراهيم فهمى المحامى
31/3/2016