جارى التحميل
استخدم زر ESC أو رجوع للعودة
زنه ف ودني
@@@@@@@@
زِن ف ودني يا عم ناموس
غصب عني أنا سامع ليك
خايف بعد الزنه تدوس
طول الليل وانا احايل فيك
رغم الزنه تساوي كابوس
أبعد عني الله خليك
سيبك مني يا عم ناموس
انا مش طايق تاني عمايلك
مهما تزن ومهما تبوس
طول الليل فوق راسي وشيلك
وانت تشكشك بالدبوس
وهو انا يعني آذيتك مره
ولا ف مره طلبت فلوس
دا انت من الشباك والباب
لما تشوف ف اللاوضه فانوس
تجري بسرعه تلم أخواتك
تدخلوا ضغري زي لصوص
تبقي الليله عذاب للفجر
زن ولسع وقرص بموس
ولاّ بتفرق بين نايمين
ست عجوزه ولا عروس
حتي وإن كان طفل صغير
هو ف نظرك برضو يجوز
انا مش عارف أخرك إيه
إنت تشكشك واحنا نلوص
عايزين نفهم بعض يابيه
ممكن نلعب ع المكشوف
فين الدم يا عم ناموس
دا احنا خلاص مابقاش فيه دم
عايز دم نجيب مخصوص
وهو بالمره برضو نجامل
أصل الدنيا مشيه حظوظ
فين الدم يا عم ناموس
بعنا ضمير وقبضنا فلوس
سبنا الدنيا بتغرق بينا
حظ الخايب ع المتعوس
لما الخايب يعمل ناصح
يزرع تحت التوته فانوس
فاكر إن التوت هينور
وإن المعزه هتبقي جاموس
وإن الفرخه هتبقي نعامه
وإن البوصه هتبقي عروس
وإن القرد هيبقي غزال
لما يجمّع مال وفلوس
وإن غراب البين هيراوح
وإن البومه هتبقي طاووس
وإن اللقمه الحاف النشفه
بكره هتبقي فطير وغموس
وإن الواد محفوظ أبو قوره
بكره يساوي الواد محروس
يلبس هدمه ويقلع غيرها
عنده زريبه وفيها جاموس
يعني الروس بكره هتتساوي
حتي الحافي والبلبوص
كله هيبقي ف أول صف
زي الطوب لو كان مرصوص
لما عينيه سرحت مني
قمت صحيت م النوم مفروس
لسعه ف إيدي ولسعه ف راسي
زنه ف ودني زي كابوس
فجاءه سمعت أذان الفجر
قلت الذكر بيهدي نفوس
برضو أصلي ووفي الندر
وانت برحتك روح يا ناموس
@@@@@@@@
بقلم /// طه إبراهيم
(مجلة عشاق الشعر)(1)(ممدوح حنفي)
ساحة النقاش