فلكولور شعبى ...الاستاذ احمد فؤاد نجم

الغرام في الدم سارح
والهوي طارح معزه
والحنين للقرب بارح
والنوي جارح
يا عزه يا إبتسامه فجر هلت
بددت ليلي الحزين
يا ندي الصبح اللي ساسا
فوق خدودي الدبلانين
بلّ شوقهم صحي لون الورد فوقهم
كل خد وشم ورده مين يدوقهم
غيرك انتي ومين سواكي
يا حياتي يا ملاكي
يا نسيم الحب لما هب هز القلب هزه
يا هوي الاحلام يا عزه
الليلادي جم خدوني يا ملاكي
جوز تنابله ونص دسته
من التيران كنت باحلم يا حبيبتي
كنت باحلم بيكي انتي كنا قال
أنا وإنتي قال ف جنينه خضرا
ومحاوطها البرتقان
والسيسبان وإنتي جوا قرنفلايه
بالعبير بتستحمي
أجري يمك يا هوايا
تسبقيني وتجري يمي
أحضنك وأشرب عبيرك من شفايفك
والغصون وأقفه وشايفه بتراعينا
بس خايفه م العيون
والعيون بتقول كلام
والكلام طاير حمام
بينادينا بالاغاني ويهادينا بالسلام
كنتب بحلم يا حبيببتي
كنت با حلم بيكي إنتي
أيوه انتي ومين سواكي
يا حياتي يا ملاكي
يا نسيم الحب لما هب هز القلب هزه
يا هوي الاحلام يا عزه
وأنطلق في الجو فجاه
يا حبيبتي صوت مفاجاه
صوت يخلي الدم يجمد
إصحي يا أحمد
وأنتهي الحلم الجميل
وابتدا الهم التقيل
فين إمام إنتوا مين إحنا ناس مكلفين تيجي سالك مش ح تتعب
وأحنا طبعا معذورين
إنتوا دود الارض والافه المخيفه
إنتوا ذره رمل في عيون الخليفه
إنتوا كرباج المظالم
والماسي إنتوا عله ف جسم بلدي
إنتوا جيفه سكتوه ابن الكلاب
سففوه من التراب فتشوا كل الآماكن
طلعوا رفوف الدولاب
كمموني يا حبييبتي
كتفوني يا حبيبتي
قوموني. . قعدوني
كل شعره في جسمي
بالعين فتشوها
المخده من جنانهم
شرحوها وإنتهي التفتيش
ما فيش صدقيني ما تخافيش
هو فيه يا عزه عندي ممنوعات
غير باحب الناس وباكره السكات؟
بص واحد م التنابله جوا عيني
وإنتي عارفه عنيه صافيه وطيبين
زي كل عيون بلدنا يا حبيبتي
شباكين ع القلب دوغري موصلين
كان مناه يلمح علامه خوف بسيطه
طب حييجي الخوف منين ابن
العبيطه هو مين فينا الجبان
ولا مين فينا اللي خان
اللي قلبه بالمحبه وبالاماني
وبالربيع لاخضر مزهر
والاغاني ولا كلب الصيد
وأسياده الاباطره
أكالين لحم البشر فوق الصواني؟
هو مين فينا الجبان
ولا مين فينا اللي خان
هو بص في عيني بصه
إرتجف وف حلقه غصه
واتعوج ومال وقال
جملتين مش مفهومين
أصله شاف صورتين جمال
في العيون الطيبين
مصر في العين الشمال
وإنتي في العين اليمين
أحمد فؤاد نجم