غني يا شاعر .. بقلـــم / طه إبراهيم

غني يا شاعر
@@@@@@
غني يا عم الشاعر قول
كل حكايه وليها أصول
سمي وسبح عن النبي صلي
تحلي السهره ويحلي القول
افتح قلبك للي يصحبك
وعرض شعرك ف المعقول
خليك واعي وخليك فاهم
إوعي تجيب سيرة مسؤل
إوعي تقرب م البهوات
خليك طيب وابن اُصول
غمض عينك وامشي فحالك
جرب مره تكون مشغول
جوه الحيطه وخليك ماشي
لف معاها عرض وطول
خليك عامل مش موجود
أحسن حآجه تكون مجهول
إدفس راسك جوه ف جسمك
خليك زي الطفل خجول
اللي يحبك واللي يجملك
واللي يصور ع المحمول
نفسي يا شاعر تاخد بالك
إوعي تلمح جوه القول
إوعي لسانك يفلت منك
ترفع صوتك يجي الغول
يقرش عظمك ينهش لحمك
يمنع عنك أي ميول
تعمل إيه لو أكلك مم
زي السلاطه ف طبق الفول
إوعي تفكر إنك شاطر
وإنك وسط الزحمه تصول
إسمع مني وخليك ساكت
بكره الدنيا الوحشه تزول
* * *
غني يا عم الشاعر قول
كل حكايه وليها أصول
سمي وسبح عن النبي صلي
تحلي السهره ويحلي القول
جرب تحكي عن العشاق
أيوه بجد كلام معقول
فاكر عنتر واللي حصله
طول الليل واليوم مشغول
عبله يعني لحست عقله
لما قبلها ف قلب المول
لما عينيها سحرت قلبه
خد نمرتها علي المحمول
راح لأبوها وطلب الأيد
أصله مدردح وابن أصول
بس أبوها يعني إستغرب
مين هيربي ومين هيعول
دا إنت يا ولادي لسه صُغير
لسه يعدي عليك كم حول
روّح يا ابني وذاكر ياله
إوعي تسلم بالمقبول
عنتر يا ابني دا سبع غدنفر
صاحب همه تساوي عقول
عايز تعمل نفسك عنتر
تبقي مثالي وأد القول
عنتر راجل عنده شهامه
لف الدنيا عرض وطول
كان الشاعر لما يحب
وكان الفارس لما يجول
غني يا عم الشاعر قول
كل حكايه وليها أصول
سمي وسبح عن النبي صلي
تحلي السهره ويحلي القول
@@@@@@
بقلم / طه إبراهيم