((وصية أمي ليّه)) كلمات الشاعر: محمد العراقي

وصية أمي ليّه
إياك يا مصر تطاطي 
دا فدا ترابك حياتي 
دي أمي عليك وصتني
من وقت ما أنجبتي
ساعة ما رضّعتني 
من حبها و دفتني 
ما بين حبات ترابك 
اللي بحنان ضمتني 
بعطف و شبعتني
يا مصر من حنانك 
و من وقتها حثتني 
أمي و علمتني 
أحبك أنا و إخواتي 
قالت مصر يا أولادي
غالية و لازم تُصان 
أمانة و في رقابكم 
إياكم يوم تُهان 
دوسوا رقاب الأعادي
و اللي باع و اللي خان 
و اللي نفسه مريضة 
و غدار طول الزمان 
دا اللي بيكره بلادنا 
وضيع رخيص جبان
و اللي يشوه تاريخنا
ملعون و ماله أمان
وشه بيضحك يا ولدي 
و هو بالسموم مليان
و يقول كلام معسول 
ما يعديش اللسان 
و ميعرفش إن مصر 
محفوظة من الرحمن 
ما قرأش يوم تاريخها 
و لا عاش مع القرآن 
و اللي يروع قلوبنا
ملهوش ما بينا مكان 
و اللي يحرك دموعنا 
أبدا ما هوش إنسان 
و اللي يقتل ولادنا 
غدره فاق الشيطان 
مطرود من الرحمات 
و الله عليه غضبان
و اللي يحبك يا مصر 
له حبنا و الأمان 
من كلمات الشاعر 
محمد العراقي 
8 / 2 / 2016 م