(( محستنيش )) بقلم أ. / كرم شحات

........ محستنيش ........

محستنيش ف يوم عُمرك
ولآ عُمرك
حاولت تشوفنى كحبيبة
وكل ما بينا عادى كلام
وكام بسمة
ومنى سلام بتنهيدة
ورُوح بتبوح ضرورى نروح
ونفهم قلبه إيه ظروفه
لكنى باجيك كلامى يروح
ويغرق حسى ف كسوفه
واخاف أسمعها انا منك
محستنيش

محستنيش وانا قلبى
حبيب قلبى
شهور وشهور بيتمناك
تحس بنبضه إيه مخبى
سراج دربى
ياشاغل كل عقلى هواك
بحبك حُب غيرنى
وشعلل فيا حيرنى
وزاد الحيرة دى إنك
مبتقوليش
محستنيش

محستنيش ف يوم عمرك
سؤال ولابُد يلقى جواب
ورُد بسرعة من فضلك
عشان صبْحت حياتى عذاب
عشان أقدر ف ليلى أنام
وابيع الظن والأوهام
صارحنى قولى ما يهمك
ولآ تخبيش
محستنيش

# كرم شحات #