قلبي أتغير .. بقلم الشاعر/ طه ابراهيم

شعر غنائي
قلبي أتغير
******
يا حبيبي وإن
فكرت تحن
أنا قلبي أتغير
وكبر ف السن
كان قلبي ضعيف
مخلص وشريف
يستني النسمه
ف ليالي الصيف
يستني الهمسه
والجو لطيف
يستني الكلمه
من غير تزييف
يستني رساله
ع الساعه ترن
يا حبيبي وإن
فكرت تحن
أنا قلبي أتغير
وكبر ف السن
يا حبيبي بجد
أنا أملي إتهد
وأنا قلبي خلاص
مش فاضي لحد
مشغول بحجات
والعمر أهو فات
والباقي ساعات
وانت اللي اخترت
ومشيت ف العند
وجرحت النن
يا حبيبي وإن
فكرت تحن
أنا قلبي أتغير
وكبر ف السن
بتقول من تاني
علي شوق واماني
أنا همشي وسيبك
يمكن تنساني
كان قلبي ف إيدك
ضيعته ثواني
لو كان هيفيدك
كنت إترجاني
أنا خايف أسامحك
يمكن يعصيني
ما كفايه ملامحك
كانت فضحاني
دلوقتي أنا شايفك
علي طول بتئن
يا حبيبي وإن
فكرت تحن
أنا قلبي أتغير
وكبر ف السن
*******
بقلم / طه إبراهيم