آسفه .. بقلم : محمود ناصر

(آسفه)
زي العاده مسكت فوني تفتش فيه
وانا مضايق لكن من غير اي نتيجه
فرّت الفين اسم واسم
لمحت عينها اسم خديجه
صرخت صرخه هزت بيها حيطان البيت
قالت بعد العمر ماعدى خلاص حبيت
قلت استني
اسمعي مني
قادت نار الغيره قويه تهد البيت
شوفي حقولك انتي جوه العين متشاله
لأ متقولشي مش محتاجه اي قواله
انا حطلبها خلاص دلوقتي
ليه استني واضّيع وقتي
حسمع صوتها
واخرب بيتها
واعرف مين هي دلوقتي
قلت براحتك
يمكن دا يبقي ف مصلحتك
جابت الاسم ورنت رنه
سمعت صوت تليفونها بيرن
قالت اخرس بس استني
عقلي خلاص مني حيتجن
بايديها فصلت تليفوني
تليفونها دا معدش بيرن
طلبت تاني وتاني وتاني
كل ما تطلب فونها يرن
في يمينها ماسكه تليفوني
تليفونها ماسكاه بشمال
لقيت رقم الطالب ليها
مكتوب اسمه ابو العيال
شردت لحظه
تاهت لحظه
سكتت لحظه
قالت ليه مسميني خديجه
قلت اتمني تكوني خديجه
تبقي صفاتك زي خديجه
ويكون عقلك. عقل خديجه
ويكون عطفك. عطف خديجه
ويكون حلمك. حلم خديجه
ويكون حبك. حب خديجه
اتمناكي تكوني خديجه
فتحت عينها
نزلت دمعه علي خدينها
قالت آسفه
*****************
محمود ناصر