مجلة عشـــاق الشعـــر الإلكترونية (ممدوح حنفي)
مالك يا مصر
رايحه جايه فى حوش البيت
وأنتى ست البيت والقصر
ليه محتاره
ده أنتى البيت والشارع والحارة
عامله زى أم العروسه
كل اللى همك اللى قاعدين ف الكوشه
ماليه الدولايب فساتين ألوان على كل لون
كل يوم تغيرى فستان لون بعد لون
ده يبان عليكى شفاف
وهو من جواه داكن مليان عفار
مليان سموم وجواه حوت بيبلع أحلامك
وقوام يتوسخ فتقومى تقلعيه
وتلبسى تانى اللى بعديه
يطلع أوسخ من اللى فات
يا أما واسع يا أما ضيق
بس أنتى اللى غلطانه
انتى اللى سبتى الترزى يقصقص توبك على مزاجه
وانتى طول عمرك فنانه بتفصلى لكل الخلق لبسهم
بس على العموم ولا يهمك
أحنا مش هنسيبك تانى لأى حد
يطمع فيكى أو ينساكى
بكره اللى جاى ليكى
هيكون حقيقى بين ايديكى
وتختارى كمان اللى يرضيكى
واللى مش عجبك يرحل
ومش هتشوفه تانى عنيكى
هيرحل ف سكه بعيده وما يرجعش مصر
وترجعى تانى بلد النصر
أم الدنيا فى كل عصر
بحبك بحبك بحبك يا مصر
تحيات شاعر الاحزان يحيى زكريا
ساحة النقاش