مجلة عشاق الشعر الإلكترونية. .ممدوح حنفي
اُصبغ شعرك خف حواجبك
إعمل نفسك فرقع لوز
لمع وجهك شدّ في جلدك
انت فنظر الدنيا عجوز
شعرك لبيض سر جمالك
يعني دلال ووقار ونفوذ
نور ......... فوق .... راسك
يوم الحشر يساوي كنوز
شعرك لبيض هو رصيدك
وسط الجنه مكان محجوز
شعرك لبيض نور هينور
لما في يوم العتمه تفوز
ليه بتغير فطرة ربك
ليه تتمرد وانت عجوز
فاكر يعني إن الدنيا هترجع
تحت إشارتك لما تعوز
يعني هترجع تاني شباب
تلعب عُقله وتكسر لوز
و لا هتمرح فيها وتلعب
بين مزيكه وبين ارجوز
و لا النيه يا عمي عروسه
شابه جميله بردو يجوز
اصل الست الهانم كبرت
جوه الصحه سرير محجوز
وانت شباب فوق الستين
حقك تلبس شورت وشوز
فوقي يا حآجه الله يخليكِ
اوعي تقولي كبير وعجوز
اوعي تخلي الراجل يصبغ
أو يتغني بصوت فيروز
يبقي ساعتها الراجل طب
قلبه مشعلل نفسه يفوز
شايف إن الدنيا جميله
و اللي هيجري يلاقي حظوظ
فاكر نفسه الواد أبو اصه
يكره جدا قشر الموز
حتي اسنانه يا عيني اكسرت
نفسه يقزقز حبة لوز
انا مش ضد إنك تتجوز
أو تتهني بأي كنوز
انا مشعايزك تعمل شاطر
شاب صغيّر وانت عجوز
تبقي البنت يا عيني ف صدمه
وانت علاج و حقن كلوكوز
اصبغ شعرك خف حواجبك
اعمل نفسك فرقع لوز
لمع وجهك شدّ في جلدك
انت ف نظر الدنيا عجوز
ساحة النقاش