قصيده بعنوان(ماعرفتكش) بقلم الشاعر / محمد مغاورى

مجلة عشاق الشعر الإلكترونية. .ممدوح حنفي 

فوق برواز الصوره..الصوره 

مابتزهقش

لكن عينى حبيبى شافتها

ماعرفتكش..

وأنت الصوره ساكنها وعايش

مابتقلقش..

صوتك هش 

وجسمك قش..

وحلمك ميت ..مابتحلمش..

ممكن جرح الليله يسيبك
تنزف جوه الفرح لهيبك
وانت الصامد وانت الصامت
مابتسمعش..
لو مولود الفجر ندالك
أو عدّالك
تمشى طريق الوحده لوحدك
مابترجعش..
لو حكايات النجم تجيلك
جوه غناوى الحب تشيلك
مابتتشلش..
ممكن طفل صغيّر ماشى
يلعب ماشى
يرمى فى عين بروازك طوبه
جواك يكسر
ألفين غنوه
ماتغنتش..
يضحك يضحك جواك يلعب
وانت مقطع جوه الصوره
مابتضحكش..
واأنت الساكن جوه الفاضى
طب ليه راضى إنك تسكن
جوه الصوره
لو تلقاها الشمس تقولك
حابس ضلّك
أخرج بره الصوره تعال
واسكن حاله
فيها الماضى الذل يقولك
ماعرفتكش......