مجلة عشـــاق الشعـــر الإلكترونية (ممدوح حنفي)
التغذية فى المدينة الجامعية
زجل ساخر للدكتور عبدالله منصور
كتبت سنة 1973 بالمدينة الجامعية بالأسكندرية ،وغناها ورددها مجموعة كبيرة من الطلبة فى مطعم المدينة
_______________________________
أكل المدينة الجامعية
وجبات ومحسوبة عليه
مدعومة مع سوء النية،
ومعدلة لسد الشهية
اللحمة كاوتشوكى نيه
صاحية بتتلعبط اهيه
بتوردهالنا الجمعيه
مزوقينها ..ومفلفلينها
تقولشى هيه ميه ميه
والطبيخ نىّ ماستواش
والحصو رزه ماتنقاش
وبيحسدونا ويفكرونا،
جايين هنا ناكلوا ببلاش
والفول بقى بروتين بسوسه
لو جالنا من غير سوس نبوسه
والمعترض جاه قطر يدوسه
لو مش عاجبه..ينزل حاجبه،
الأكل كدا..على قد فلوسه !
متعهدين جبارين وبتفترى
فى كل غدوة البرتقال السكرى
مابيتغيرش تقولش أمر وعسكرى
ويا اما تاكله سكرى يا تشترى
والحوسة ان المشرفين
ودن من طين أوعجين
لو تشتكى مين يسمع مين؟
دول استحالة يزعلوا متعهدين
ماعرفش ليه كدا متفاهمين
ساحة النقاش