مجلة عشـــاق الشعـــر الإلكترونية (ممدوح حنفي)
العلاج بالدجل :
____________________
حكاية مريض نفسى..ضحكوا عليه فى الشور
كان اتغير سلوكه......... بقى مكتئب مكدور
واهله دقة قديمة ....... بطيبة ونية سليمة
سابوا الدكاترة ، وداروا ع الشيوخ بالدور
اّخر دجال قال لهم : الشاب ده ... ممسوس
وعشان نفكوا العمل.. تجيبوا ربع جاموس
وعشرة ديك رومى وعشرة كيس اندومى
وشنطة زرقا فى احمر،وماتنسوش الفلوس
،وخيشة قديمة ليتيمة....ومستكة وجاوى
قالوا:الحاجات دى كتير..قال اه ماهو مخاوى
..لازم تجيبوا العطية .....ونقدموها هدية
تروح لملك الجان ....والكلفة ع . الغاوى
..جابوا الحاجات كلها وراحوا لسيدنا البيت
، تمتم ، وخبط وزعق....يحضر العفريت
عَلا دخان البخور.... وطفى كل النور
زعق وقال :حى ،لقوا صوت يقول انا جيت
فجأة..... لقوا خبط جامد ، وحد كسر الباب
ودخل زابط وقال له : وقعت ياسى ايهاب
تروح من الشرطة فين ، وانت عليك حكمين
، وانتوا يامغفلين ..واقعين فى ايد نصاب؟!
__________________ تمت
ساحة النقاش