=لأنك حبي الوحيد==كلمات الشاعر / عبدالله الهواري

مجلة عشاق الشعر الإلكترونية. .ممدوح حنفي

لانك حبى الوحيد

مش هاخبى واقول واعيد

وانت بعيد

بارتب همومى بعدك

م القديم لحد بعدك

و بارتب احلامى

الباقى منها بعد اللى ضاع

واللى ضاع بعد اللى باقى

اللقا قبل الوداع
والوداع قبل التلاقى
وبالملم البواقى
اشى وجع
اشى جروح
ومش قادر لكن صابر
حبك باقى ف الروح
ودموعى بتسيل
وف الدنيا عابر سبيل
لحدود الكون
من ابعد نقطة ف الدايرة
صابنى الجنون
وبرتب ايامى
اللى راحت قبل الجاية
والجاية قبل اللى راحت
اسوا شىء ف الترتيب
ان ريحتك ف الترتيب فاحت
بشكل عجيب.!!!!
وكانك جاى.!
ما عرفتش ارتبها ازاى
فى البواقى ولا الرايح ولا الجاى؟
اتاريها جواى

ملهاش ترتيب