مجلة عشـاق الشعـر الإلكترونية .. ممـدوح حـنفي
يا اهْل الجَمَال والحُسْن فيه
ناس قبلُكُم كانوا جُمال
كانِت عُيونهُم مَصْيَدَه
ل قَلْب الفَوارِس مِ الرِجال
عَ الشاشَه تِلْمَح إسمُهُم
بتضَحِّى بالساعات ومال
كات البُيوت مِحْتاجَه لِيِه
لَجْلِنْ تِجِيب قُوُت العِيال
بَسّ الدَلال اللى انْعَرَض
خَلَّلا المَلاك عن شَرْعُه مال
والكُلّ راح السيما لجْل
يمَلِّى عينُه من الدَلال
مَرِّت سِنين بَعْد السِنين
وفْ فَجْأه عادوا المُخْتَفِيِن
لكِنُّهُم يا خسارَه فِىِ
صورِة حُطام فاق الخَيال
والصورَه دِىِ لإنْسانَه كات
مالكَه القُلوب فِ السَبعينات
دِلْوَقتِ بَعْد السِنّ شوف
واسْألْها راح فين الجَمال ؟؟
فين القُبَل والنوم على
كتاف الرِجال عَبْر الشَاشات ؟؟
فين القميص الشِفْتِشى
ف مَشْهَد نَزَع مِنَّا الحَياء ؟؟
عَلِّمنا طَعْم البوسَه ايه
وازَّاى تِبُوُظ سِتّ البَنات
يا زبيدَه دبلِت وَرْدِتِك
والوِشّ من كَرْمَشْتُه قال
لينا عِبَر مايوَفِّيهاش
الحَرْف فى سِتِّين مَقال
واللِّى يشوف صورتِك أكيد
راح يسْألِك نَفْس السُؤال
فين الجَمال ؟؟.. فين الجَمال؟؟
فين الجَمال؟؟ .. فين الجَمال؟؟
بقلم عبدالله الغلبان
img1.nawaret.com
ساحة النقاش