غلطات بنعملها في علاج الامساك، الامساك من الحاجات اللي لازم تتعالج فورًا لانه بيتعب الجسم وبينفخه وله آثار سلبية كتير، لكن في نفس الوقت هو مشكلة منتشرة جدًا، وللاسف في طرق العلاج بتاعته بنعمل غلطات كتير من غير ما ناخد بالنا بتسبب تدهور الحالة وبتبقى مزمنة بدل ما تكون عابرة، وده اللي لهلوبة بتنبهك منه علشان نتجنب الغلطات دي. - اتجنبي الاكل المصنع:لانه بيبقى غني جدًا بالسكريات والصوديوم وقليل في الالياف وده بيسبب امساك، علشان كده لتفادي الامساك يفضل نعتمد على الاكل الطبيعي بدل المصنعات في الحلويات والاملاح.
- اعتمدي على الالياف:النظام الغذائي الفقير في الالياف بيسبب امساك، لانها بتحسن الهضم، وبنلاقيها في الفواكة والخضار وبذر الكتان، لكن الكتير منها مش مفيد، لانه كترها في النظام الغذائي بتعمل نتيجة عكسية وهي الانتفاخ وعسر الهضم. - نظمي اكلك:الاكل في مواعيد والانتظام على طريقة معينة مهم مش بس علشان التخسيس بس لكن علشان صحة الهضم والاخراج، التعود على دخول الحمام الصبح وشرب ميه على معدة فاضية صباحًا مهم جدًا لعلاج الامساك بس تبقى عادة مش حاجة مؤقتة. - الرياضة:مهمة جدًا علشان ظبط وظايف الجسم بشكل عام والهضم والاخراج بشكل خاص، التعود عليها بشكل منتظم بيقلل من حدوث الامساك.
