حازم

مالك يانانسى هو انا كل ما اجبلك سيرة الفرح تقلقى وتتوترى كده..

نانسى

انا ..

حازم

امال انا ..

ياستى ماتخافيش علقه تفوت ولا حد يموت..

ها.. تحبى امتى بقى نعمل الفرح؟

نانسى

انت مش عارف ان ماما  شارطه ان مافيش فرح وجواز غير بعد ست شهور على الاقل من الخطوبة ؟

قطع

دعاء

ادينى جيت خير ان شاء الله ..

عمر

عايز اعرف ايه اللى قلبك مره واحده بقالك اسبوعين لا باعرف اشوفك ولا اكلمك ولو اتقابلنا لازم ندب خناقه ..  انت ناسيه ان كلها شهر وحنتجوز..

دعاء

مش باين لنا جواز ..

عمر

ليه بقى ياست هانم انا جاهز من ساعة ماخطبتك ووالدتك عارفه كده .. لكن انا مش عارف سر تأجيل الجواز ايه ؟

دعاء

ماما عايزانا نعرف بعض انا وانت كويس قوى عشان نفهم بعض وكل واحد يعرف طبع التانى.. لكن للاسف كل واحد فينا مش عارف يفهم التانى ..

عمر

والله الكلام ده تقوليه لنفسك مش ليا.. انا فاهمك قوى.. انت عايزه واحد يسيبلك الحبل على الغارب..

دعاء

بس ماباعملش حاجه غلط..

عمر

كل تصرفاتك غلط فى غلط..

دعاء

بقولك ايه ياعمر لو عايز نستمر مع بعض ماتحولش تتدخل فى خصوصياتى طالما ماباعملش حاجه غلط ..

عمر

وهو انت لما تقعدى تهزرى مع واحد غريب بالمياعه اللى انا شوفتها وانت مخطوبه مايبقاش غلط ..

دعاء

عن اذنك انا دماغى صدعت ..