اتنين شَبَاب

ـــــــــــــــــــــــــــــــــــــــــــــــــ

حُبِّي لِيكِي لِسَّه عَايش مَا انْتَهَاش

مَهْمَا بَان الشَّعْر الابْيَض

قَبْلِك اِنْتِي اِلحَيَاه مَا عِشْتَهَاش

وَلاَ كُنْت يُوم فِي الحُب بَغْرَق

دَه انْتِي حُبِّي وِانْتِي قَلْبِي

وِانْتِي رُوحِي اللي لِيهَا بسُرْعَه بَهْرَب

دَه انْتِي جَنَّه آه فِي قُرْبِي

دَه انْتِي مِنِّي لنَفْسِي أقرَب

اِنْتِي عُمْرِي اللي عَدَّى وِالنَّهَارْدَه

وِانْتِي بُكْرَه اِنْتِي أحْلَى مِ الشَّبَاب

غَالْيَه عَنْدِي وِانْتِي شَارْدَه

دَه انْتِي وَرْدَه وِانْتِي أطْهَر مِ السَّحَاب

اِنْتِي كُل حَاجَه لِيَّا

مَهْمَا قَالُوا الشَّعْر شَاب

اِنْتِي ضَيِّي ونُور عِنَيَّا

اِنْتِي فِي الدُّنْيَا الصِّحَاب

هَاتِي اِيدِك فِي اِيدَيَّا

فَاكْرَه أوِّل يُوم جَوَاب

كُنْتِي مَكْسُوفَه شُوَيَّه

كُنْتِي أجْمَل فِي الحِجَاب

عَدِّت السِّنِين أوَام

وَلاَ حَسَبْنَا في يُوم حِسَاب

عِشْنَا حَيَاتْنَا فِي الغَرَام

زَيّ مَا قَال الكِتَاب

وِرَغْم العُمْر بِينَا عَدَّى

لِسَّه جَامْعَانَا المِخَدَّه

وِلِسَّه جَامْعَه ايدِينَا وَرْدَه

تقُولْش لِسَّه اتْنِين شَبَاب

حُبِّي لِيكِي لِسَّه عَايش مَا انْتَهَاش

مَهْمَا بَان الشَّعْر الابْيَض

ــــــــــــــــــــــــــــــــــــــــــــــ

كلمات الشاعر أحمد شاهين

------ مصر - أسيوط ------