المره دي جايبلكم مصيبة من داخل كنتاكي شخصيا
الكلام علي مسؤلية اللي راسل الرسالة
مصيبة بحق و حقيقي و رعبتي و خوفتني جدا انا مقاطع كنتاكي من زمان بس متوقعتش كم الفساد ده فيه !
يقول كريم :
بالنسبه لحمله وجع بطن بفلوس بالذات المطاعم العالميه زي كنتاكي .. هقولك شهاده لله من واقع عملي في مطاعم كنتاكي لفتره 3 شهور
المطعم كان عباره عن صاله كبيره ومطبخ .. و دور تاني فيه تلاجه تبريد و تانيه تجميد
اول يوم ليا طلعت دور التلاجات كاني داخل مقبره بجد الريحه لا يتحملها بشر كان في دم في كل حته ومش نضيفه خالص
وجع البطن يبتدي من اول مرحله للدجاج وهو التسييح
بتتنقع في احواض غسيل ستيل مقرفه مليانه بكتريه من ريحتها
بعد كده بيقوم واحد بمرحله التتبيل
وده كان مشكله بعد ما يحط الدجاج في ماكنه التتبيل بيحطها في شبك بلاستيك الشبك ده بيجي من الشركه رولات طويله جدا .. العامل هو الي بيقطعه تخيل كان يدوس علي البكره بالبوت الي دايس بيه علي الارض ويقطع الشبك بالسكينه .. وده من الحاجت الي قرفتني بجد ..
تاني حاجه تعبئه الكول سلو وما ادراك ازاي بيتعبي اي عامل يقوم بتعبيته ع حسب اوامر المدير .. واحد مش لابس كلافز وممكن يعبيه بايده او بعلبه ويشرب سجاير عادي جدا وهو بيعبي ....
لحد كده ده الحاجات الي بيرتكبها العمال بدون علم المدراء
أخش بقي ع المدير والمساعد بتاعه :
قطع الاستربس الشركه بتجيبها كبيره ده كان يقطعها ع تلاته او اتنين عشان تعمل عدد اكتر يعني يعني قطعه الاستربس بتاعه الشركه ممكن تعمل وجبه كامله ..
تاني حاجه الهمبورجر كان مدته قربت تنتهي لسه لها اسبوع كان بيسوق لها .. ويعملها وجبات للعمال ..
خش بقي علي عدم الضمير الي بجد
لاحظت ان عامل الصاله بيلم كوبايات البيبسي من ع الطرابيزات المفروض يرميها في التراش الي موجود في الصاله لا ده كان يخدها ويدخل المطبخ ويغسلوها و يحطوها يتعبي فيها تاني ..
انا كنت مفكر ان المدير ميعرفش ان ده بيحصل الا لما في مره بيسالني بيقولي عندنا كوبيات بيبسي اد ايه قلتله مش كتير قالي طب كويس اخلي الواد بتاع الصاله يغسل شويه عشان بكره الخميس قولتله ازاي يا مستر حرام مش دي بيشرب منها ناس وممكن تكون عندهم امراض ... قالي هو بيشرب من بوق الكوبايه ولا من الشاليموه قلتله من الشاليموه .. قالي طب خلاص مش منها ضرر
وانا من واجبي وانا بعبي البيبسي لو لقيت الكوبايه مبلوله برميها في التراش من غير ما حد يشوفني
- الغش بقي في البيبسي له طريقتين
الشركه كانت بتيجي تضبط الماكينه نسبه السيريب وال صوده بالميه ... المدير يمشوا من هنا يلعب فيها ويخلي نسبه الصودا اكتر عشان ميستهلكش سيريب كتير ويغطي العجز والسرقه ...
و الطريقه التانيه يقولي انا عاوز ابيع تلج مش بيبسي كان بيخلينا نملي الكوبايات تلج للاخر ولو لقاني مش بمليها كويس الله يحرقه المساعد بتاعه كان يجي يدوس ع رجلي .. والفرينش فرايز كان يقوليس خف ايدك شويه ومن ده كتيررر
غير السرقه في السندوتشات عشان يغطي عجز الجبنه الامريكي لو السندوتش فيه اتنين يحط واحده .. ولو مفهوش خالص يقولي اضرب ع الكاشير جبنه اكتر وتتحسب ع الزبون والزبون اصلا مخدش حاجه .. سرقه ف سرقه
وصور كوبايات البيبسي وهما لمينها مصورها وعندي ع الكمبيوتر في مصر .. والله علي ما اقول شهيد
نسيت اقولك ع الزيت لو شفت منظره يع يع انصحك معدتش تاكل في كنتاكي والمطاعم الكبيره دي مقلب كبيييير
والكول سلو بردوا ساعات بيجيب كميات كبيره في الاعياد وبتفرط منه بيبيعه فاسد ولونه اسود والناس بتاكل وخلاص .. والسلطه الخضراء البايته تتقلب كل يوم مع الجديده .. ولو شفت السلطه اصلا وهي بتتعمل يا قرف السنين
المخالفه الي كنت مصورها كوبايات البيبسي
الصور اهي الي انا مصورها
انا مذهول و مش قادر اصدق يا كريم بجد الكلام اللي بيتقال ! كارثة حقيقة محتاجين الكلام ده يلف والناس كلها تعرف و محتاجين رد و توضيح من مطعم كنتاكي ! علي كل المصايب دي !!!
