زجل مصرى

بركاتك يا فوزى

يا مسهل الأمور
يا نافد ف الوزارة
و مريح م الطابور
تذاكر قطر .....
........سيما
جواز مشكاح و ريما
عفريت ابن القديمة
و واصل ف المرور


فوزى ف كل حاجة 
ف الجد و ف الهزار
يحبسلك خمسة ستة
بس ما تبقاش حمار
تديله الشاى بتاعه
تشوف قوة دراعه
بإشارة من صباعه
الجنة هاتبقى نار


ف كل حتة فوزى
و ف كل سكة واحد
دى عصابة و ليها أفرع
حتى ف قلب المعابد
و الذنب ذنب مين
انتبهوا يا مؤمنين
باعوا الحق المبين
باليورو و بالدولار

مره مراتى جت وقالتلى
قوم فسحنى بسرعه اوام
قلت ف نفسى واللهى فرصه
اخلص منها وارجع انام
خدلك ساعه واتنين بتغير
والفستان مربوط بحزام
والجزمه عماله بتشكى
من رجليها مترين قدام
نازله تدب وهاريه السلم
وهاتك رغى وكتر كلام
اخرتها شاورت للتاكسى
سابتنى ورا وركبت قدام
السواق بصلها اتعكنن
طول السكه يقول ف كلام
مش فهماه00 بس انا فاهمه
واسمع منه واقول ياسلام
نفسى اقوله مره ف عمرى
وتسمعه منى الست مدام
كله شتيمه وتف ونف
وضرب بوانى شلاليت واقلام
دى قرفانى والله ف عيشتى
ومطلعه عينى سنين وايام
سيبنا التاكسى وروحنا الممشى
قلت اتفسح انا وياها
ماشى ورانا شويه صييع
وهات تأ ليس ع الست بتاعتى
ياواد ياتقيل00 ياتخين ياملظلظ
وانا مطنش ابص ف ساعتى
ماشيه معايا م الغيظ هتفرقع
م التئليس وكلام الصييع
راحت باصه أوام ف وشاشهم
سابو الممشى وهربو بسرعه
والله زعلت شويه جبناء
ضيعوا منى ماتش مصارعه
سبنا الممشى دخلنا المطعم
راحت طالبه بسرعه كوارع
غير الفته وطبق الشوربه
وفضلت تاكل وبتتصارع
خبط ورزع فوق الترابيزه
وهات تخبيط بماسوره الكارع
اتلموا علينا زباين المطعم
وكمان ناس كانت ف الشارع
قلت ياناس دا مافيش حاجه
دا طقم اسنان محشور ف الكارع
سبنا المطعم روحنا السينما
وجابت لب لبان وسودانى
وهات طرقعه ف لبان وتقزقز
وترمى القشر فى قفا قدامى
وهات تريقه ع الفيلم وتضحك
حتى الضحكه ما هيش عجبانى
وقبل الفيلم العربى ما يبدأ
سمعت صوت هيهد ودانى
راحت نايمه وهات ياشخير
واتلمو علينا الناس من تانى
سبنا السينما دخلنا جنينه
والناس قاعده كتير حوالينا
عماله تحكى وبتتشاكل
واتلمو الناس تانى علينا
قلت ياستى كفايه علينا
اللى عملتيه وفضحتينا
مفيش مره ف يوم ويعدى
الا وصوتك يعلا علينا
قلت ف نفسى والله انا حاسس
ان الفسحه دى غم علينا
هو انا يعنى دا كان قصدى
وانت بطبعك دا مخلينا
مساجين جوه حيطان مقفوله
وانت ف وادى ما حاسس بينا
كفايه كدا طولت عليكم
وادى حكايه الست بتاعتى
واسف جدا انا مش قاصدى
ذنبك ايه تسمع لحكايتى
دايما كده علطول جلبالى
ف اى مكان راح اكون وياها
ودى اول مره واخر مره
راح اتفسح تانى معاها
نصيحه اهى لوتسمع ليا
اوعى ف يوم تسمع لوليا
دى مجنونه وعقلها طاقق
ومعروف انها نكديه
لسه فيه تانى بقيت الحلقه
لو عايزينها راح اقولهالكم
بس ان شالله ما تزهقوا منى
وانا ف ثوانى راح اكتبهالكم


ياكـيلو لحمـــــــه !!!
***

ياكيلو لحـمه انا نفــسى أطـولـــك
واقع فى عرضك واقع فى طـولك

إن كان قالـــولك كلام يزعــل ..!
تشربفه رسمى ف ميعاد وصـولـك

ياكيلو لحمــه
***

ياكــيلو لحـمه مــن بعــد .. نابـت
يامرّه صحـت من الف .. خابـــت

ياحلـــه قـــومى ياكبـشه .. رقـِّــى
من بعد شعـْـره فى دقـنى .. شابت

ولا إنت يعـــنى خـــــلاص ياستى
العدس صاحبـك . مفاصلى سابـت

ياكيلو لحمــه
***

ياكيلو لحــمــه كان إيــه جـَــرالـك
سعـرك بـِيغـْلـى وســعـــرى نـازل

من كتر شُـوقى الــيك فــى شـوربه
أو حَـتى عَضمـه انا فــيــك أغـازل

يابو خَد وردى . يابو عضمه لولى
اللــه يجـــــــازى كــــل العــوازل

ياكيلو لحمــه
***

ياكيــلو لحمــــــــه إديـنى بـوســـه
نـِسـيت مابـيـــنا كـــل اللـى فـــات

والحله هامسح بكــــهنـه واعصــــر
واشـــرب أبــوها حــــتى الفتــــات

والحـق عنــدى !.. اطلــب وتؤمــر
ان شـ الله تطلب يصحى اللى مــات

ياكيلو لحمــه
***

ياكـيلو لحـــــــمـه .. شَـرَّفـت بـيتـى
حقـقــت حلـم كـــــان فـى الخيـــــال

نادرين عليَّــــا فى يــــــــوم وصولك
تـشــريفـه رسـمى .. أنـــا والعيــــال

والبس جـونـــتى . ونشيد ( بلادى )
وافضـل أغنــى (عــاش اللى قــال)

ياكـيلو لحمـــــــه !
***

ياكيــلو لحــمه .. انا قلـــت : اشــمَّر
خلاص .. هابفتـك .. خلاص هـااحمَّر

وان حـد .. خـَبَّـط .. هاشور ودانـى !
والفــتـَّه .. أرزع بعــيــش مـقـمـَّــــر

والليله .. تبقــــى ولا.. كـُلِ لِيــــله !
والصبـح البـس .. طـرطور وازمـَّـر

ياكيلو لحمــه!!!



 
لقيت الفانوس مرة ودعكته -- طلعلى عفريت قاللى شبيك لبيك 


قلت خلاص الذل أنا ودعته -- ويا عفريت بالطلبات هاهريك 


قالى هأوأو يا إنسان -- دانا العفريت بن الجان 


ما يهمنيش مكان وزمان -- واطلب وعندى البرهان 


قلتله عاوز قمح زُرع فى مصر -- ومسؤولين يبطلوا فشر 


وحكومة متعصرنيش عصر -- ومرتب يسترنى لآخر الشهر 


وعاوز عيش بدون طوابير -- وحكومة ضد التبذير 


وانتخابات من غير تزوير -- ورئيس سابق أشوفه كتير 


وعاوز فى بيتى كيلو دقيق -- وسبب مقنع لأى حريق 


ومجلس شعب بدون تصفيق -- وفى كأس العالم لينا فريق 


وعاوز أزور شرم الشيخ -- وصباعين كفتة اللى فى السيخ 


وأشرب مرة عصير بطيخ -- وأخرج من القسم بدون تلطيخ 


ونفسى الضحكة ترجع تانى -- وحتة لحمة كندوز أو ضانى 


وجنيه مصرى زى البرانى -- ورصيف للمشى أنا وخلاّنى 


رد العفريت عليا بغشم -- وقال يا مصرى ماكنش العشم 


بص.. أنا ممكن أنقلك الهرم -- واسدلك الأوزون اللى اتخرم 


وأرجعلك الأكل اللى اتهضم -- وأعملك بقرة من الغنم 


وأعملك قصر من العدم -- وأقولك معنى شرم برم 


بس طلباتك طلبات ملموس -- عقله خلاص أكله السوس 


ده تخطيط يا بنى ومدروس -- إنك تعيش على طول موكوس 


وأحنا بناخد منكوا دروس -- إزاى نخلى العفريت متعوس 


ويا رب ترجعنى تانى الفانوس -- وزى بعضه أعيش محبوس 


بدل ما أخرج واتبهدل زيك -- وأعيش موكوس على متعوس 




يا شعبي وحبيبي يا قدري ونصيبي يا حاطك في جيبي يا ابن الحلال 

يا شعبي يا شاطر يا جابر خواطر يا ساكن مقابر وصابر وعال 

يا واكل سمومك و بايع هدومك يا حامل همومك و شايل جبال 

يا شعبي اللي نايم وسارح وهايم وفي الفقر عايم وحاله دا حال 

أحبك محشش مفرفش مطنش ودايخ مدروخ وآخر انسطال 

أحبـك مكبّـر دماغـك مخـدر ممشـّي امورك كدة باتكال 

وأحب اللي يكذب وأحب اللي ينصب وأحب اللي ينهب ويسرق تلال 

وأحب اللي شايف وعارف وخايف وبــالع لســانه وكاتم ما قال 

وأحب اللي قافل عيونه المغفل وأحب البهايم وأحب البغال 

وأحب اللي فاضي وأحب اللي راضي وأحب اللي عايز يربي العيال 

وأحب اللي يائس واحب اللي بائس و احب اللي مُحبط وشايف المحال 

واحبك تســـافر وتبعد تهاجــر وتبعت فلوسك دولار أو ريال 

واحبك تهـلل تهبـّـل تطبـّل عشان ماتش كورة وفيلم ومقال 

واحبـك تأيــّد تعضّـد تمجّــد توافق تنافق وتلحس نعال 

لكن لـو تفكـّر تخـطط تقـرر تشغل لي مخك وتفتح جدال 

تحضّر نشـادر تجـمّع كوادر تلمـّع تقمـّع تظبـّط مجـال

وتبدأ تشاكل وتعمل مشاكل وتنكش مسائل وتسأل سؤال 

وعايز تنور وعايز تطور وتعمللي روحك مفرد رجال 

ساعتها هاجيبك.. لايمكن هأسيبك وراح تبقى عبرة وتصبح مثال 

هابهدل جنابك وأذل اللي جابك وهيكون عذابك دا فوق الاحتمال 

وامرمط سعادتك واهزأ سيادتك واخللي كرامتك في حالة هُزال 

وتلبس قضية وتصبح رزية وباقي حياتك تعيش في انعزال 

هتقبل ها حبك.. هترفض هلبـّك 



هتطلع هتنزل هاجيبلك جمال

هتطلع هتنزل هاجيبلك جمال

شعب فقرى
 
 
نظرا لأن النعمة فاقت حدها
ولأننا مش قدها
ولأن فعلا أنجازاتك
فوق طاقتنا نعدها
ولأننا غرقنا فى جمايل
مستحيل حنردها
نستحلفك ……. نسترحمك
نستعطفك …….نستكرمك
ترحمنا من طلعة جنابك
حبتين
عايزين نجرب خلقة تانية
ولو يومين
 
أسمع بقى
إحنا زهقنا من النعيم
ونفسنا فى يومين شقى
عايزين نجرب الاضطهاد
ونعوم ونغرق فى الفساد
بينى وبينك حضرتك
دا شعب فقرى مايستحقش جنتك
أنا عارفه شعب ماينفعوش
إلا شارون وبلير وبوش
عايز يجرب الأمتهان
ويعيش عميل للأمريكان
بيمد "غازه" لأسرائيل
ويومين كمان ويمد نيل
أهو يعنى نشرب مية واحدة
ندوب فى بعض
 
ماء وماء وماء
ونفض سيرة الانتماء
وبلاها نعرة وطنطنة
تبقى البلاد "مستوطنة "
متسلطنة بالسرطنة
إية اللى خدناه م الكرامة والإباء
حبة خطب وكلام…كلام 
إحنا راهنا على النظام ورضينا بخيار السلام 
بخيار
حنسد عين الشمس بيه علشان مايطلعش النهار
ويطلع لمين؟حبة معارضة مغرضين؟
وحسب بيان السلطة شلة مأجورين؟
 
ياعم فضك سيرة وارضى بقسمتك
دا شعب مش فاهم أكيد .. يالا أطرده من رحمتك
وإن كنت غاوى الحكم خليك مطرحك 
هاغطس واقب وأعود بشعب يريحك
راضى وعمره مايجرحك
أخرس
ومايسمعش … وأعميلك عنيه
مش كل قرش يبص فيه
مايقولش لأه /وفين / وليه
يضرب ينفض فى السليم وعلى الصراط المستقيم
كل اللى يعرف ينطقه عاش الزعيم .. يحيا الزعيم
 
أحمد فؤاد نجم
أضف الى مفضلتك 


رائعة جديدة للشاعر أحمد فؤاد نجم 


كأنك مفيش


برغم إن صورك فـ كل الدواير

وكل المداخل وكل المحاور

ومليا الشوارع على كل حيط ..

مطنش علينا وعامل عبيط ..

كأنك مفيش ..

***

يا فرحة قلوبنا رئيسنا ظريف ..

فُكهي ..

إبن نكته ودمه خفيف

فـ عهدك سيادتك فَرَشنا الرصيف

وآخر مُنانا الغُموس والرغيف

وكل أمَّا تُخنُق ندوَّر ..

مفيش !!

***

مسيِّب علينا عصابة حبايبك

فضايح وسرقة ونهب بسبايبك

مابين حزب نجلك ... وهانم جلالتك

وجيش الغوازي إللَّي داير يجاملك

وناملك وقاملك .... وحارسك وأمنك

شبعنا مهانه ... شبعنا لطيش ..!

وأنت .. مفيش !!

***

باعونا فـ حضورك ...

ببركة عِبـيدك وغالي وسرورك

باعوا الأراضي .... وكل المصانع

وباعوا البنوك ....

وقدَّام عِنيك .... صوتنا إتـنبح ..

ننادي عليك ..

إلحق يا ريس : ده باعوا الحديد !!

وأنت منشِّف دماغك عنيد !!

.. كأنك مفيش !!

***

دوشتوا دماغنا " بجمال " طلعتك

ومن يومها وإحنا عَبـيد حضرتك

ما تزعلش إني مواطن أبيح

ورافض كلابك فـ شعبك تطيح

فسادهم يا ريِّس واضح .. صريح

قوم بينا صلّح وفتَّش .. وثور

ح نكتب تاريخك ياريِّس بنور

مش تبقى عايش كأنـَّك مفيش !!

***

ورحمة أبوك .. مادام أنت قاعد

عيب لمَّا عُصبة نَـوَر يسحبُوك

م تُقبض عليهم .... م تقطع إيديهم ..

م تعمل عليهم يا ريِّس شاويش

بدل م انت ساكت وقاعد مفيش

***

ياريس علىّ الطلاق تعبانين !!

ياريس علىّ الحرام كفرانين !!

صبرنا سنين ..

سيادتك مسلطن

وشعبك وناسك بتاكل مسرطن

وتشرب مجاري وميت سم هاري ..

ومش دريانين !!

ما تنهض يا ريس تلم الديابه ؟!!

ده شعبك غلابه ....

ومليان طيابه ...

وهوَّ الشفاعة ف يوم الحساب

وهما البطانة الحُثاله الكلاب

ما يملاش عنيهم غير التراب

وليهم ضوافر

وميت ألف ناب

وواقفين لشعبك ورا كل باب

لإمتى ح تسكت وليه الغياب ؟

ده ياما ممالك طواها التراب

حياتنا ياريس تعب فوق عذاب

يا ريس " شريفك " ماهوَّاش شريف !!

" نظيفك " يا ريس ماهوَّاش نظيف !!

وحتى " حبيبك " ماهواش حبـيب !!

وأنا غصب عني ... خلاص إستويت ..

بـ غـُلبي إنحنيت ...

وطلعان عنيا ... وصعبان عليا

بحسبة بسيطة ومن غير خريطه ..

وكونك مفيش .. لقيت متساويش

ومش فارقه أعيش ...

نويت أشتكيك للِّي فوقي وفوقك

وأصلي الفرايض ....عسى يفـُك طُوقـك

قالولي إللي يسجد عدو النظام !!

حاولت أحكي حالي ...!!

قالولي الحكاوي نميمة وحرام !!

فكرت أكتب ..

لقيتكم سيادتك منعتوا الكلام !!

فقررت أحلم ..

هاحلم سيادتك وأفُك اللِّجام

ولو مش هيعجب سيادتك يا فندم

وصِّي العساكر .... تاخُدني أمَّا انام !!

***

حلمت إني شعب ....!

حلمت إني شعب ومصلوب بطولي

على أرض سمرا

ودمي بينـزف ومليان جروح

وفوق صدري جمرة

يميني مربّط على أرض طابا

شمالي ممسمر فـ "أولاد علي"

ورجلي على جزع نخلة فـ "حلايب"

ومرتاح براسي على حِجْر مصر

وشوفتك ياريس ....كأنك ولي ..

كأنك نبي ..

فـ إيدك عصاية وليك معجزات

وشايل صليبي وبتفـُكني ..

وانا فـ جنَّه خضره .. وتحتي جداول ..

ومن فوقي نور ... وريحة بخور ..

همست ف ودانك بآخر وصيّة :

إنسى إللي فاتك ...

هننسى الأسية ... !!

أمانه عليك ..

حُط الوطن جُوَّه نِنِّي عينيك

كرامة عيالنا أمانة ف إيديك

بحق إللي بينّا يا ريِّس وبـينك

وحَق اليَمِين و" ألكتاب " فى يمينك

بحق الشهيد .. إللي رافع جبينك

وجيش إنتصارك فى يوم العبور

وجيل حُر طالع .... وعدته بدور

لملم عيالك ... وجمَّع فـ مالك

وإسحب " جمالك " وسيبنا وغور

__________________

غابة 

غابة كلابها ديابــــا ... و نازلين في الناس هـم 
و اللي ينام في الغابة ... رح يتاكل هــــــــم 
و اللي يدور وشـــــو ... في غمضة عين يتهــــــم 


و اللي يغيب عن جحرو .. لاجل القوت و المم 
يتخان من ورا ظهرو ... او يتاخد خم 
غابة بتاكل ميتة ... غابة بتشرب دم 


غابة كلابها ديابا ... نازلين بالناس هم 
غابة و ناسها غلابة .. خيخة لا ناب و لا فم 
متكلين عالصدفة .... متاكلين بالهم 


و احنا يا ملح الغابة .. هم يحرك هم 
ضايعين و سط ديابا .. مش فاضيين نهتم 
فاهمين و بنتغابا ... مش راضيين نتلم


عاشق وطن

سابق خطاوي الزمن والوقــــت يسرقني 
والــــــعمر هو التمن يجري ويسبقني
عاشق تراب الوطن إمته هيعشقـــــني 
أنا إبنه ولا لقاني جنب باب جــــامع ؟
ولا فـ قلبه المدامع بحر غـــــرقني
بحب أسمع جحى لما بيحكيــــــلي
قــصـة أمل مفرحة تمحي عذاب ويلي
واليأس ذي الرحا يطحن مواويــــلي 
وبحب شمس الضحى لو حتى تحرقنـي 
مشتاق لصوت الأدان والنسمة والمَيْــه 
ولأسمي فوق الحيطان ولكف بأديــه
ولحضن أمي وهي عليا بتسمــــي 
مشتاق لقلبي الجريئ وصديق يصدقني

-------------------

وإيه يعني

وإيه يعني الطريق طول

مأنا قولتلكو مالأول طريقنا طويل

وقولنا الصبر بيـنول

وبكرة الدنيا تتحول بصبر جميـل
وطول ما الحلم لسه صـديق
وقلبك زي قلبي جـريء
يطول بينا الطريق ويضيق
مسير الشمس بكرة تميل
وتـرمي نورها ودفاهـا
ونحلم حلم وياها يبل الريق
ويجمعني بأحبابي وأصحابي
وكل إللي بيسمعـــني
وأعيش ويّاكو من تـاني
ونمشي السكة ونعــاني
ومهما الدنيا تنساني 
ومهمــا الحلم يخدعني
لا يمكن اتوه فـ أحزاني
ومش هصرخ بأه ياني
لكني بكل وجداني 
هقول تاني
وإيه يعني ؟؟ !!!!!!
--------------------






عيد الطفولة

راجع عيد الطفولة طراطير وبلونــات 

مراجيح بحبال طويله وبكل الألوانات

لكن وسط الأغاني والضحك والتهانـي

شايفين في وادي تاني أطفال في مخيمات

راجع عيد الطفولة طراطير وبلونات
راجع عيد الطفولة فرحه بتملا الوجـود
والطفل في المخيم وعيونه ع الحدود
يحلم بشمس بكره بتشرق من جديــد
يحلم بدنيا فاكره حقه يكون لـه عيد
يحلم كفه الصُغيّر تضمه ألف أيـــد
تمسح دمعة عيونه ودموع الأمهات
راجع عيد الطفولة طراطير وبلونات
راجع عيد الطفـولة بيحقق الأمـاني
نحلم والحلم يكبر يصبح أحلى الأغـاني
وأجمل حلم السنه دي نطوي كل الآلام
ونشبـك الأيادي ويـرفرف الحمـام
في بلادك وف بلادي يطرح غصن السلام
يرجع عيد الطفولة من غير دمع وآهات 
يرجع عيد الطفولة طراطير وبلونات





---------------------

قصيده استغفار

بصـدق شعــري لـو حتى يكـون كـداب

بخبــط شعـــر علـى الأبـواب
وأطبطــب شعــر علـى الأحباب
وف الوحدة يـونسني وف السكه يحمســني
ولما الدنيـا تقـرصــني يحـسسني بإني شباب
سنين الغـربة وخداني وعمره ما سابني وحـداني
وقولت بلادي وحشاني كتبت الشعر ألف جواب
وقالوا الدنيا حسداني عملت الشعر ألف حجاب
أنـا اللي الشعـر ألفني وجاني فيوم وحلفــني
ما شيء ف الليل يخوفني إذا ضل القمر أو غاب 
ومن يومهــا بقيـت عايش بقلـبي جـريء 
ومن يومهــا بقـالي الشعـر أغـلا صـديق
ولما الـدنيا بيّ تضيق بلاقي الشعر يسكني ويحضني
ويفتحلي فحضنه طريق يخـدني لأخـر المشـوار
وأكون غـدار لو أنكر إنه كان صاحب لمشواري
وكان داري وأجمل دار
ولما بقيت فيوم شاعر قالو لي الناس بقيت فشّـار
وقالـوا الكدب كـان أول طــريق النـار
ملاني الخوف وكَسّرت القلم وقطعـت كراسـي
وشيلت الذنب فوق راسي وكان الرعب سجانـي
وفاجئه لاقتني من تاني كتبت الشعر ع الأسوار
ولما عرفت يـوم إني لا يمـكن أبقى غـير شاعر
كتبت قصيده استغفار
__________________



رزقنى المولى باربع بنات 


رزقنى المولى باربع بنات 
تهانى وفاطمه وشاديه وايات
وطول عمرى نفسى اجيب الولد
 لبويا حلمه اللى مات واحقق 

بعجلى اللى راكب فرده شمال 
انكد يوماتى على ام العيال 
دا صبحت حياتها معايا محال 
واضرب وانغذ كمان فى البنات

تقولوا انى جاهل تقولوا حمار 
دا من غير ولد ما يعمرش دار 
وخلفة بناتى دا نحس وعار 
بحس انى قدرى اصبح رفات 


عقدت العزيمه وطفت البلد 
ع اشوف بنت مهره تجيب الولد
ورحت ام هاشم طلبت المدد
وندرت ندرى انا من سكات

وقالوا ام صالح ولاده وولود
ومات جوزها سابق بطلقه برود
وزينه وشابه ومهره وعود
وصالح والدها فاتها ومات 

كتبت كتابى وجبت الشوار 
وطلبت مطالب ودهب ودار 
قولتلها بصى معنديش هزار
واكره ماعندى خلفة بنات 

تشديلى حليك تجيبى الصبى 
يكون ولد راجل وده مطلبى 
ع اشوفه بعينى ع اروح للنبى 
احج ووفى الندر اللى فات

قعدت ليالى وليالى وشهور 
وبحلم بولدى واسميه سرور 
واجبلة الموائد فى يوم الطهور 
 

وجاتنى البشاره زفت وطين
وخلفت مراتى يا بوى بنتين 
يا مرى ياقهرى ع اروح انا فين 
يا ريت كنت حرمه هرقع صوات 

ولثمت نفسى بتوب الحريم 
يا رب انت عالم بحالى رحيم 
وجانى اخوايا وعبد الرحيم 
راجل كله تقوى وحافظ ايات 

وقال ايه جرالك هتحكم فى كون
دا ربك دا واهب (كون فيكون)
وهو اللى مانع وهو الحنون
وغيرك بيحلم بدفر البنات 

ومرتك دا ارض وانت البذور
هتزرع سبانخ ما تطرحش فول
متعملش راجل وسبع وغول 
وتكفر بخالق سبع سموات 

ارجع لربك يغفر عصاك 
كله ع يغلط محدش ملاك 
بنتك فى شبتك هتصبح عصاك