وتروي والدة فتاة ربة بيت غير متعلمة، تجربة زواج ابنتها قائلة: أنا مش متعلمة وناس غلابة عندي أربع بنات وعيلين صغيرين كلهم مادخلوش المدارس إحنا نس على قد الحال والعلام موضوع الجواز دا خيبة كبيرة بس حنهمل ايه ده نصيب أسود وحط علينا بي أهو درس ولو يجيني عريس شحات من هنا وأنا أوديها لحد عنده .
أنا جاتلى واحدة جارة بس ماعرفش عنها حاجة مش من الشارع وصحيح من البلد بس ماليش بيها سابق معرفة وإحنا عندنا "سلو بلدنا" نحب نستر العيال فاتحتنى فى الموضوع في إن واحد جايب عريس سعودي وعايز بنت بنوت وحلوة وحيدفع كويس وفضلت تحكي على الخير والكرم بتاعه،
ولما جه مكناش نعرف عنه إلا إنه واحد شغال عنده شاف البنت وقال حيجي ياخدها على مصر وإحنا معاها علشان يعقد عليها وسلم أبوها 5000 جنيه وأخد منهم السمسار 1500 عمولته وسافرنا مصر وكان قاعد في شقة ماعرفش منين وكان راجل أكبر من أبوها وقال إنه هيسيبها عندنا ولما يجي القاهرة ياخدها معاه في شقته لحد ما يطلعلها أوراق تسافر بيها والبنت فرحت بالشبكة، وحددنا اليوم عشان العقد وجه واحد عنده في الشقة وأبوها مش بيعرف يكتب ولا يقرأ ولا أنا وخلونا نبصم على القسيمة وخلاص وسلمنا عليها ومشينا وبعد أسبوعين جه عندنا البلد أعد معانا يومين تلاتة وقلنا للناس إنه اتجوزها ، البنت كانت ساعتها ماكملتش 15 سنة حتى "مابلغتش" وهو يجي فوق الستين طبعاً الجيران باركوا وهو سافر وفضل يجي سنتين يروح ويجي علينا يفضل معانا يوم والتاني ياخدها تفضل كان يوم وبعدين تيجي عندنا وهو يسافر وكان شارط عليها تاخد حبوب منع الحمل عشان عنده عيال وبعد كده جه وقال مش حينفع أحطها على إنها مراته في جواز السفر عشان عنده مشاكل ومكناش بصراحة فاهمين حاجة فطلع لها جواز على أنها شغالة لأهل بيته.
وسافرت وفضلت عنده في بلده يجي كام شهر وبعدين نزلها لوحدها من غير شبكتها ومعاها 1000 جنيه وقال حيبقى ينزلها
وفضلنا على الحال دا ننتظر ماحدش يسأل فينا ولا نعرف نروح الشقة تاني لحد ما جه اللي شغال عنده وعطانا ورقة طلاق وعرفنا بعد كدا الفخ الى وقعنا فيه
ساحة النقاش