خالتى عزيزة
للشاعر : محمد ضباشه
خالتى عزيزة .. ست لذيذة
أتعلمت معاها كتير
معنى الأسرة .. ومعنى اللمة
ومعنى الحب بقلب كبير
دايما كنت بحب لقاها
وتلقانى فى سماها بطير
واموت م الضحك من قفشاتها
وأزقزق زى العصافير
ماهو قلبها كان أبيض ناصع
وتملى كان يمشى ورايا
مره يقولى أوعى تخطى
ومره يقولى تعالى معايا
على الطبلية كانت ست جميلة
ماسكة اللقمة تقدمهالى
ومعاها بسمة وحبة ميه
أنا والجيرة وكل عيالى
يعنى شمس لما بتطلع
كل الحتة تقول عقبالى
وأن غابت عننا ليومين
تلقى غيبتها تغير حالى
كان جوز خالتى يناكف فيها
وهى تملى تعديها
وتلقى البسمة على شفايفها
ولا كانت حاجة تأثر فيها
وتقولى أى أساءة ياواد
ماهى العشرة قوام تمحيها
بس نميل لجل تعدى
وبلاش نركب مأسيها
أيدها على الكب تطبطب
وماشية توزع بسمات
وأيديها تخرج من جيبها
للأطفال حبة نفحات
كانت قطر جرا وراها
شلة كبيرة من الستات
أنتى يا عيشة صجى لسانك
وأنتى يا خضرة بلاش هفوات
وأنت يا مريم راضى ابوكى
ومدى حبالك للحلوات
كانت رمز لكل بلدنا
وسيرتها بالخير فواحة
وعشان كدا كانت محبوبة
وتملى عيشاها فى راحة
وكان تعليمها يدوب راح تقرى
لكن العقل مقامة كبير
وعلشان كدا يا خلتى عزيزة
أتعلمت معاكى كتير
وماتت خلتى عزيزة ولكن
كل كلامها عايش فى ودانى
لما دموعى روت الأرضى
وعلى مين غيرها هعيط تانى
أخدت كل حياتنا الحلوة
وسبتنى جوه فى أحزانى
وأتشقلبت الدنيا معانا
ولا كام ست فيها عزيزة
فى الحنية وطيبة القلب
ولا قعدتها تشوفها لذيذة
دايما صرخة تهز البيت
والبوذ مادد شبرين
ولو قلتها خارج برا
تتعصب وتقول على فين
وكأنى راجل شخشيخة
أو لعبة فى ايد الستات
اللى نسيوا تملى أصولهم
وتملى نازلين طعنات
ماهو لو شافوا خالتى عزيزة
كانوا عرفوا مرة يعاملونى
بالحنية وطيبة القلب
ولقلوبهم مرة يعدونى
رحمة ونور عليكى يا خالتى
ياما نفسى اشوفك فى بناتى
ومعاهم دايما هفتكرك
وأدعيلك على السبحة ليلاتى
وألقى معاهم على الطبلية
حبة فرحة يعدوا ساعاتى
وأرجع واضحك على قفشاتهم
لحد ما تخدينى معاكى
