الدنيا ماشية على بطنها
محمد ضباشه
الدنيا ماشية على بطنها
ورجولها تعبانه
والناس على ضهرها
من الفقر متهانه
بتصرخ ومين يسمع
يا خلق تعبانة
جهلكم بقى ماشى
وعيون العلم عميانه
مش شايف طريق بكرا
ونور شمسه مشغلانه
أروح لمين وأشتكى
والشكوى زهقانة
اروح لفين وأبكى
والدمعة زعلانه
من كل قادة البلد
اللى فاكرينى فرحانة
--
منين يجينا الفرح
وقوس الكمان مكسور
حتى أوتار قانونا
نغمه خارج مقبور
والطبلة مترقعة
والناى يروح ويغور
حتى اللى جاى يطرب
طلع راجل مهبول
ومش لاقية واحده تزغرت
وكأن الفرح مقتول
فقلنا كفاية كدا
وخلونا حمير بديول
--
لو صرختى هتفيد
ما كنت هستنى
ولو دمعتى هتقيد
أنا كنت أتمنى
ابكى على دنيتى
وأنا أمتى هتهنا
واقعد مع نفسى
واحكيلها كتير عنا
بأن حروب الفقر
دايما على الفقير شنه
