مناقشة على الفيسبوك عن المزرعة السمكية بقناة السويس

إعداد/محمد شهاب

 تامر دياب‏ (صحفى بجريدة الأهرام التعاونى) 8/12/2016

أسئلة محرمه جديده حول الإستزراع السمكى بقناة السويس (أين الأجهزة الرقابيه)؟."""""" عايز أراء وليس لايكات""""
بعد مقالى ( الأسئلة الحائرة) الذى نشر فى الأهرام التعاونى حول المشروع والذى تسبب فى منعنا من زيارة المشروع ههههههههه يفتح حصاد الجمبرى أسئله أكثر أهمية وخطوره أطلب رأى المتخصصين والخبراء بها : أولاً :- قالوا أنهم حصدوا 3 أطنان من 140 حوض وبإعتبار أن كل حوض 1 فدان على الأقل فمعنى هذا أن كل طن حصدوه من 46 فدان فما رأيكم ؟ والأسعار 135-160جنيه للكيلو فماذا قدموا للمواطنين ؟ وكيف يتم التعبئة بهذا المصنع البدائى وأين المصائع الضخمه التى وعدونا بها ؟ عايز رأيكم ؟

Said Abo Omar (مزارع أسماك من بورسعيد و دمياط) 9/12/2016

خليها صالح البلد والمصريين وكان بودى ان نفس الأسئلة حضرتك تطرحها على الشركة الوطنية حتى ميكونش واضح بالنسبة لى ان القلم موجه نحو مشروع بعينه يكون بحق صالح مصر يا استاذ تامر من حقق تسءل لكن غير مقبول الاتهام قبل السؤال اسلوبك من فترة ضد المشروع بدون مبرر وانا قبلتك واتكلمت معاك فى هذا الموضوع والأستاذ محمد غانم جيه المشروع بعدها واتعرف على حجم وجهد الناس على الطبيعه وأن شاء الله المستقبل أفضل دى أول دورة والامور مبشرة بالخير والناس بتستجيب للنصيحة

Ahmed Kassem (مزارع سمك) 9/12/2016

- معلش ياحاج سيد بدون زعل انت الوحيد والحاج رجاءى المستفيدين مما يحدث ولا تنسى الملايين المنصرفه من دم المصريين بدون فائده او عائد الا مزاج ونفقاق بعض الاشخاص

-اما كلمه فنكوش هى مصطلح شعبى ينطبق على ما حدث

 Said Abo Omar  9/12/2016

 مكتش أتمنى أن اقولها بس لله وعشان ثقافة التخوين ال فى نفوسنا والله ان لم ا تقاضا مليم من شغلى فى المشروع ده سواء الزريعة او الإشراف على التجربة والحمد لله وبفضل من الله أن دى أول إنتاج رابح ماليا وتم استرداد تكاليف الأعلاف ومصاريف التشغيل وأن شاء الله الباقى أرباح للمشروع والاستفادة الأكبر تدريب اكتر من 20فرد على زراعة الجمبرى ان شاء الله العام القادم خبرتهم هتساعد على رفع كفاءة الانتاج

محمد فكري (مهندس -جامعة قناة السويس) 9/12/2016

 يا حاج سيد ابو عمر مع حفظ الالقاب طبعا - انا معرفشي حضرتك بس لفظة حاج افضل من الهندسه و الدكتوراة و خلافه اكيد - حضرتك ذكرت حاجه قلقتني اكتر مما انا قلقان - موضوع استرداد تكاليف الاعلاف و مصاريف التشغيل و الباقي ارباح - واين مصاريف استرداد تكلفة المشروع و اهلاكها التي اعتقد انها اكبر من الاعلاف و التشغيل

Said Abo Omar 9/12/2016

تفتكر فترة استرداد رأس المال فى شركة بالحجم ده تكون كام سنة

محمد فكري  9/12/2016

كنت اتوقع رد افضل من كده يا افندم مش رد السؤال بسؤال للغلبان و لا القلقان اللي هوا انا - افكر حضرتك بس ان ده مشروع انتاجي استثماري مش مشروع خدمي و ان كان حتى المشروعات الخدمية بيبقى ليها دراسات و جدوى و اجابات مش اسئلة - ده مش طريق و لا كوبري و لا مدرسة حكومية و لا مستشفى العائد بتاعه غير مباشر - عذرا - الا اذا كان العائد رفع الروح المعنوية برده

أ.د. عبد الحميد عيد(المعمل المركزى لبحوث الثروة السمكية) 9/12/2016

 للاسف قرات تعليق يتهم من ينقد المشروع بانهم خونه وكلنا يحب مصر ونريدها احسن دوله فى العالم والسؤال كم مواطن مصرى يستطيع شراء كيلو السمك ب 80-100 جنيه وكليلو الجمبرى ب 130 جنيه علما بان اسعارها فى دول حوض البحر المتوسط ارخص من مصر وربنا يوفق الجميع لخدة مصر وتكون ام الدنيا

محمد فكري 9/12/2016

ماشي  يا افندم انا هروح اخبط دماغي في الحيط علشان استريح و اريح بس قبل كده هقول لحضرتك مثال للاجابة اللي تريحني - المتوقع مع بدء انتظام عملية الانتاج الاقصى لكامل وحدات المشروع خلال كذا سنة وفق الخطة الموضوعة ان عملية الاسترداد لرأس المال تتم في خلال كذا سنة تالية مع مراعاة اهلاك سنوي نسبته كذا سنويا - فقط لا غير - تبدد قلقي و قلق الجميع

محمد فكري 9/12/2016

المصانع والمفرخات كان من المفترض البدء بها فى الجزء الثانى من المرحلة الأولى بعد إفتتاح الرئيس السيسى للمشروع والتى كان مفترضاً لها 6/8/2015 مع القناة الجديده ولم يتم الإفتتاح منذ ذلك التاريخ ولم يتم إنشاء المصانع ولا المفرخات ؟!!!!!!!!!!!!!!!!!!!!!!!!!!!

 Mohamed Eltabakh   (مركز بحوث الصحراء) 9/12/2016

استاذنا أليس من الطبيعي أن يكون انشاء المفرخات هو الخطوة الأولى للمشروع وليس الثانية؟

Said Abo Omar 9/12/2016

الشركة الوطنية عاملة مفرخ لو تم إدارة من خلال شركة متخصصة هيكفى مصر والشرق الأوسط

محمد فكري 9/12/2016

كل مشروع كبير ممكن يكون له عثرات - ايه المشكلة - مينفعشي يعني يتعثر المشروع - يقال ان جاري التغلب على المعوقات الفلانية و خلال كذا ستكتمل القوة الكاملة للمشروع و هيحصل ساعتها و هيسوي و و و و و - هوا انا بهيم يعني مستاهلشي افهم

Said Abo Omar 9/12/2016

 الأفضل يا استاذ تامر دياب تنتج وبعدين تعمل مصانع ولا تعمل مصانع والله اعلم بالإنتاج وأنا شايف ان الأنواع المناسبة للإنتاج البلطى الأحمر و الجمبرى وأن نسبة الأسماك البحرية فى المستقبل لن تزيد عن 10%من حجم المشروع يعنى الخريطة الإنتاجية هتتغير لتلبى الطلب والسوق

محمد فكري 9/12/2016

و الافضل من ده و ده طالما فيه ( والله اعلم بالإنتاج ) يبقى نعمل ( مزرعة تجريبية ) و نشوف الانتاج بعنينا و نحكم و بعدين نعمل المشروع بصورته النهائية بالصورة المناسبة - كلام حضرتك يخوف اكتر يا افندم - هما مكانوش عارفين او واثقين من الانتاج اصلا - كل حاجه بايد ربنا اه لا تفتكروني كافر و لا حاجه بس في ظروف طارئة مش ظروف طبيعية

أ.د. عبد الحميد عيد 9/12/2016

 ياصدقائى الاسماك البحرية تحتاج الى ذريعة والى رعاية لليرقات فى الاعمار الاولى والاعلاف ممستوردة واسعارها مرتفعة ونسبة النفوق مرتفعة مرتفعة وتكاليف الانتاج مرتفعة وعدم وجود خبرات للتشغيل وسعر كيلو السمك يتكلف حوالى 50 جنيه وسعرة للمستهلك 80-100 جنيه . كم مواطن مصرى يستطيع شراء هذه الاسماك واحتمالات التصدير معدومة لانها فى دول الجوار ارخص من مصر

محمد فكري 9/12/2016

Said Abo Omar سؤال قد تثلج صدري اجابته و اثق ان شاء الله ان حضرتك هتصدقني القول حضرتك متفائل فعلا بالمشروع اقتصاديا قولا واحدا - اقتصاديا مش انتاجيا - و لو انتاجيا فقط قوللي برده يعني لو المشروع هينتج و يستمر و يكسب من غير استرجاع المصروفات المبدئية قوللي - 

Said Abo Omar 9/12/2016

 مع بعض التعديل فى أسلوب الإدارة ان شاء الله المشروع هينجح المشروع يحتاج منظومة تسويق تصل بالمنتج إلى المستهلك بدون وسيط وتستطيع تقديم اسماك مصنعة او نصف تصنيع وتحصل على شهادات التصدير الجلوبل جاب تصبح الشركة هنا قاطرة للقطاع مع تعديل أسلوب إدارة الأحواض إلى الشراكة مع الأفراد بحيث يستطيع كل شاب مدرب يشارك فى الإنتاج بحوض او أكثر تحت مظلة الشركة المسؤولة من توفير مستلزمات الإنتاج والتسويق وتحقيق الأمن وعناصر الأمان الحيوى والكنترول هنا يتوفر عناصر التنمية المستدامة وشراكة بين الدولة والقطاع الخاص

Mohamed Adel Mansour (شركة الر- اكوا لأعلاف الاسماك) 10/12/2016

أولا : المشروع مازال فى بدايته وبدون إمكانيات ولا خبرة ولكنه يستعين بذوى الخبرة مثل الحاج رجائى غانم والمهنس سيد أبوعمر . ثانيا : السيد أبوعمر لديه خبرة متميزة فى إستزراع الجمبرى وكذلك الحاج رجائى لديه خبرة فى إستزراع الدنيس والقاروص ، ويجب أن تقدروا وجودهم فى هذا المشروع وتضحياتهم بالجهد والخبرة والمال حتى ينجح . ثالثا : الجمبرى البانمى يتم إستزراعه فى مصر لأول مرة ويجب تشجيع ذلك حتى ينجح وينتشر فى المزارع المصرية ، ولكنه فى نفس الوقت له مشاكله رغم إنتاجيته ، وبالطبع توجد كثير من المعوقات تحتاج إلى الخبرة ولن ينجح ذلك إلا بالتطبيق العملى . رابعا : أى مشروع إستثمارى يحتاج إلى 3 سنوات على الأقل لتحقيق الأرباح ، وخاصة مشروعات الإستزراع البحرى التى تحتاج إلى خبرة وممارسة لا تتوفر للكثير منا . لذلك أطلب منكم عدم التسرع فى الحكم على هذا المشروع وغيره من المشروعات القومية فى الإستزراع السمكى ، وإذا لم نستطع مساعدتهم علينا تشجيعهم ومساندتهم .

Ahmed Ali Mehrem مهندس زراعى 10/12/2016

 مع كامل احترامى لجميع التعليقات ...هذا الوقت لايحتمل تجريب ولكن نحتاج الى خبره اقتصاديه يعنى هعمل مشروع تكلفته كام وانتج منتج تكلفته كام وهل الانتاج يكفى المصروفات ام لا واعتقد ان هذا المشروع مصروفاته اكتر من ايراداته يعنى كده احنا بنهرج وليس هناك وقت للتهريج فى ظل الخراب ال احنا بندفع تمنه