مفيش حاجه اسمها السمك ياكل في الصيف أو الشتاء!
إعداد/ محمد شهاب
أستاذ دكتور مساعد / علي علي علي سليمان
السمك بياكل ويحول حسب درجة الحرارة .. لو اتوفرت هياكل .. عموما متتعبش نفسك في السؤال كتير .. روح اشتري ترمومتر لقياس حرارة المية ب ٢٠ جنيه .. وخلي العامل اللي في المزرعة ينزل بزجاجة مية مقفولة تحت سطح المية ب 70 سم تقريبا .. يعني قبل أرضية المسطاح بـ ٥٠ سم تقريبا .. ويملى الزجاجة ويقفلها بعد ما تتملي مية وهي تحت .. حضرتك هتقيس درجة الحرارة وتتبع الآتي:
- إنزيمات الهضم جوه السمكة بيقف نشاطها عند 16درجة مئوية والسمك مش هياكل
- أفضل معامل تحويل غذائي من 23 إلى 27 درجة مئوية
- درجة الحرارة لو زادت عن 29 لازم تقلل كمية العلف
- لا تستخدم علف مرتفع في الدهن في درجة الحرارة المرتفعة وخصوصا من نصف شهر 7 إلى آخر شهر 8 وعادة في الشهور دي لازم السمك يصوم يومين في الأسبوع مش يوم واحد .. لإنها لما بتصوم بتتغذى على الدهن المختزن داخل الجسم فساعتها .. الدهن هيخف .. والمناعة هتعلى .. ومتنساش إن الحر لو دخل على السمكة السمينة بيموتها وكمان البرد لو دخل على السمكة السمينة برده بيموتها
- من درجة حرارة 21 فأقل و درجة حرارة 29 فأعلى التحويل بيكون مش بالدرجة اللي انت عاوزها ..
ملحوظة:
ممكن تكون درجة الحرارة متوفرة الصبح بدرى لكن بلاش تعلف قبل الساعة ٩ صباحا لان الهضم ساعتها هيكون مرتبط بإرتفاع الأكسجين أكتر من درجة الحرارة ..
ساحة النقاش