الكلام حالف ما يصحى 
نام في حلقي بالسلام 
واللسان مسجون مينطق 
عمره راح من غير كلام 
طب قوليلي مين طاهرة 
مين هينده علي الحمام 
بعد العصاري يفرد جناحه 
يطير يحلق في الفضا 
الارض صعبه يعيش لوحده
قال يروح لاهل السما 
كل الكلام اصبح جروح 
نزف طالع روح بروح
والربيع مجاش اوانه 
والكلام ماعاد يبوح 
قلت اخلص من حياتي 
جوه سطر احكيه يوماتي 
بس سطري قال كفاية 
ذنبي ايه اشهد مماتي 
ناس وعايشة علي البسيطة
في الشمال حاطين شريطه
ذكرى كانت من سنين 
ذكرى صعبه مش بسيطة 
لما اشوف انسان بيضحك 
قلبي نار تكوي الضلوع 
وادعي ليه الضحكة تكبر 
واخبي حزني والدموع 
نفسي اعيش والاقي نفسي 
طير وسارح للجمال
مهما كان يومي وامسي
اعيش حقيقه مش خيال 
الكلام هجر الشفايف 
الكلام سافر وحالف 
ميعودش تاني للسطور 
ميعودش نور يقدر يدور
ميعودش راية للحمام 
..........
اسامه صبحي محمد
3/9/2016