***أصعب حياة***
تكون غريب وف وسط اهلك 
وحيد يا قلبي مابين حبايبك
عمال بتشكي هموم في نفسك
والكل يضحك ولا حتى سامعك
ولا حد يسأل إيه بس وجعك
الحسرة تنزل توجع في قلبك
تكتم في نفسك ما الكل سايبك
وحيد يا قلبي مابين حبايبك
===============
مشغول على كل الحبايب 
قلبك بياكلك على اللي غايب
دايما بتسأل ولاحد سايب
ع اللي بيمدح وع اللي عايب
تستني منهم سؤال يا خايب
القَلبة تيجى عليك نصايب
ويغلطوك وتقوم نوايب
قريب غريب كله يعايرك
وتعيش وحيد مابين حبايبك
===============
اللي معاك لأمش بتاعك
واللي في ايدك أهو لغيرك
كل أما تدى... الله صحابك
بس اما تيجى تمد ايدك 
مستني حد منهم يساعدك
فاكره في محله وف وقته عشمك
الكل يبعد عنك يفارقك
ترجع تلاقى نفسك لوحدك
وحيد وعايش مابين حبايبك
==============
وانت حلو جميل تلاقى
الكل جاى بشوق وباقي 
أما لما تقع تلاقى 
الكل سكاكينه تخايلك
وكله يذكرلك مصايبك
عشت طول عمرى أقولك
ادى حال الدنيا حالك
بس مش حالك لوحدك 
المقدر لك يصيبك
مش هتجنى غير عمايلك
والله صعبة الحياة تقاسمك
بس فرحك مش فى حزنك
بعتذر قطعت قلبك 
بس والله دا حالى قبلك 
وصعب تبقى عايش غريب
وانت عايش وسط اهلك
غريب وحيد مابين حبايبك 
وحيد يا قلبي مابين حبايبك
نصر الحنفــــــــــى