ثلاثية البرائة
...................
(1)
طفوله..
......................
فاكرين يا عيال
السور العالى
اللى كنا بنتشاقا عليه
بقى سو الارض
مناخيره اتكسرت يا عيال
زى العجله النصر الأجره
اللى بنسبق بيها الأيام
علشان نكبر .
لما اتقلبت بيا العجله
كبرت ساعتها بجد .
والوش تخن.
ورفيّع كان سلك السناره
اللى ف آخره
مغموس بجنيه
وتعدى الناس
وتوطى عليه
واحنا نشدوا
توطى عليه
واحنا نشدوا
عفاريت كنا
وبنسخر من أيها حاجه
كنا بنضحك على روحنا
وعلى إحساسنا
وعلى احساس الناس بالحاجه
انما دلوتى
الاحساس اتغير
مين مننا بيخاف دلوقتى
من الاشكيف
الغول
ابو رجلين مسلوخه ؟
انا عن نفسى بخاف
م الزحمه
وموت الرحمه ف قلب الناس.
وعشان كده
هربان انا من دنيتى
الى حكاوى جدتى
وكل ليله أجرى استخبى
من العصابه
ف ضحكتى
..................................
(2)
شكل جديد ...
...........................
من امتي الدنيا بتضحك للشكاي البكاي
من ميتا الواحد من اتكيف من كباية الشاي
واتفرج ع الصور المقلوبه .. بشكل جديد .
اتفرج
ع الصور المقلوبه
بشكل جديد .. وفوق يا صاحبي
فووووق يا صاحبي
تيجي نصغر
تيجي نلعب حادي بادي .....أى حاجه
ولا أقولك :
تيجي نجري ونستخبا
جوة عش النمل .. ناكل لما نسكر
وبعدها نكتب يا صاحبي
فوق جبال الرمل
سكر ..
بينا ننسا
ان جدتنا العقيمه ..لسه عايشه
جوه تجويف السجر
بينا نضحك يوم عليها ..مره واحده ف عمرنا
بينا نسرق من جرابها
لحظه حلوه
كلمه حلوه
لقمه حلوه
هدمه حلوه
بت حلوه ..لكل واحد مننا
بينا نسرق ..بينا نسرق .. بينا نس......
_ صاحبي لجمّني وقالّي
_ تيجي نسرق قبل دووووول
المرار اللي بيسرق من جرابنا عمرنا
.................................
(3)
العقل شت اتغبا
........................
اهج منى لفين
عفريتى فين ما أروح
على طول مونسنى
لو غيرت المكان
م انا برضو لابسنى
الكل ناكرنى
وانا نفسى ناكرنى
والبخت فاكرنى
بالعب معاه العند
مصيبتى انى عبيط
وبصدق الكداب
وآجى عند الباب
اخترع اسباب
وارجع منين ما اتيت
اقرف حيطان البيت
بدمعتى النجسه
واعلن النكسه
على كل اصحابى
اشكى لطوب الارض
للموتى للأحياء
وكل يوم بيزيد
كرهى للأشياء
للشارع المسطبه
يا سكة اللولبه
العقل شت اتغبا
والعباسيه منين؟
العباسيه منين ؟!!
............................
شعر / حمدي محمد حسين
ساحة النقاش