ازاي نختار موديل مناسب يخفي مناطق العيوب في الجسم مثل الأرداف الممتلئة، أو أعلى الذراع أو البطن -الكرش-؟
بالنسبة لامتلاء منطقة الأرداف "الأجناب" يفضل الابتعاد عن البلوزات القصيرة، والطويلة أيضا، المناسب جداً يكون طول البلوزة نهايته عند منتصف الأرداف، فالبلوزة القصيرة بتبرز جداً الامتلاء أما البلوزة الطويلة قوي بتظهر هذه المنطقة وكأنها عريضة جداً، كمان لازم صاحبة هذا القوام تبتعد عن الألوان الفاتحة وتهتم بالألوان الغامقة في البنطلونات أو الجيبات.
أما بالنسبة لامتلاء الذراع والصدر الكبير فيفضل أن يكون الكم واسع وطويل ونازل مقاس واحد عشان تخفي العيب ده والكم "الشارلستون" مناسب جداً وبيداري، وذات الصدر الكبير تلبس ألوان غامقة من فوق وتبتعد عن القصات اللي تحت الصدر.
الموديل المناسب للبنت القصيرة؟
لازم تبتعد عن القطع الطويلة قوي.. مثلاً التونيك غير مناسب لها أبداً لكن الطويلة والنحيفة بيليق عليها كل حاجة.
العبايات أصبحت منتشرة جداً يا ترى بتفضليها للبنات؟
العبايات شكلها حلو لأن دخل في صناعتها كل الخامات زي الجينز والكتان والشيفون والتطريز بكل أشكاله.. كمان هذا اللبس بيضيف لمسه أنثوية لأنه قريب جداً من شكل الفستان.
بعض البنات بيتضايقوا لما يلبسوا عبايات عشان لو لبست العباية مرة تبقى لازم تلتزم بيها على طول، رأيك إيه؟
طبعاً ده غلط.. مش مفروض البنت تقيد نفسها بلبس معين طالما ملتزمة بقواعد الحجاب "لا يصف ولا يشف" حتى لا تشعر بالملل أو إن شكلها أكبر من سنها الحقيقي، الإسلام لم يفرض علينا "زيا معينا" ولكن وضع شروطا.
نصيحتك لكل بنت عشان يكون في دولاب لبسها كل الحاجات العملية؟
لازم كل واحدة ترتب دولابها حسب طبيعة خروجها اليومية فدولاب البنت اللي في الجامعة غير اللي بتشتغل غير ربة البيت، لكن الحاجات الأساسية عند الكل هي طقم أو اثنين للخروج في الصباح يكون خفيف ولونه فاتح وعملي، وطقم كلاسيك للصبح -لو عندك مقابلة عمل أو زيارة صباحية- وطقم للخروج بعد الظهر وحاجة سواريه، ولو ربة منزل يفضل يكون عندها عباية أو اتنين كاجوال للمشاوير السريعة أو النادي مع الأولاد أو لو حبت تروح المسجد.. العباية دي شكلها مناسب جداً، ولو البنت عندها عباية كتان مثلاً ده شيء كويس.
معروف عنك كثرة سفرك لأوروبا لمتابعة أحدث خطوط الموضة... احنا فين على خريطة الموضه العالمية؟
بصراحة احنا متأخرين عن بره، الموضة بتنزل عندنا بعد أي مكان في الدنيا بثلاث سنوات.
إيه السبب؟
كانت هناك فترة الاطلاع فيها محدود لكن -الحمد لله- الصورة بدأت تتغير.. الشباب على النت على طول على اتصال دائم بأحدث الحاجات في كل المجالات، والفضائيات كمان قربت المسافات ودخلت أحدث التصميمات في كل البيوت وبدأنا نتطور شوية.
بس فيه حاجات بره لا تناسب مجتمعنا؟
لا أقصد بذلك التصميمات بقدر ما أعني الألوان والخامات، اللمسات الأخيرة والتقفيل..
كثير منا بيفضل الجاهز عن التفصيل لأسباب كثيرة.. كيف نثق في التفصيل من جديد؟
فعلاً في فترة سابقة كانت الثقة في التفصيل مفقودة.. الناس تجيب قماش غالي ويطلع بعد التفصيل موديل مش حلو أو مش زي الكتالوج، طبعاً ماقدرش ألوم حد ولكن الوضع اتغير كثير، دلوقتي مصممة الأزياء لم تعد مجرد "خياطة" بتنفذ حاجات متواضعة.. مصممة الأزياء أصبحت مطلعة وبتسافر بره، بدأت تنتشر فكرة الأتيليهات من جديد ولكن بيشرف عليها متخصصون، النهارده فيه أتيليه للمحجبات بس، والسواريهات وفساتين الأفراح، التخصص هو اللي خلى الناس تسترد ثقتها من جديد في التفصيل وهم على درجة كبيرة من العلم وعندهم ذوق رفيع.
ساحة النقاش