انا المصرى..كريم العنصرين
سليل المخلصين .. المؤمنين
وحامي الأمة وقت الشدايد
وشقاق السكك للواردين
انا المصرى... كريم العنصرين
******
انا المصري كريم العنصرين
فقدت العقل والروح والادين
وبعد ما كنت نجدة وروح ووقفة
منيش عارف نسيت ده كله فين؟
ومين الى سلبنى اسمى مين؟
انا المصرى كريم العنصرين؟
******
وكنت اصرخ أطفى النار بصوتى
ويحيي أمتى في الشدة ... مــوتى
مين الى كتب عارى ف جبينى ؟
ومين الى سرق شعلة سكوتى
وانا اللى غنايا صحى العالمين
أنا المصرى ..كريم العنصرين
******
أنا متباع... ماهيش عادتك يا وطنى
عدو..لعدو..ومين مقبضش تمنى
صبي البقال يتاجر في الضماير
وأحلا عمرى ضاع مستنى زمنى..
بقينا بصمتنا ــ الموت ... مكتفين
أنا المصري كريم العنصرين
******
كأن الوحل... شد الرجل منى
أنوح وأبكى وأنا قاصد أغنى
وواقفين ع الشطوط بأيادى سودا
محال .. حيغرقونى غصب عنى
ولو نصبو في قلبي ميت كمين
أنا المصرى ..كريم العنصرين
*******
بنتها من الهرم للسد .. يدى
بنتها كلها في لحظة تحدى
وكنت زعيم نبيل ما بين جيفارا
وتيتو وكاسترو ونهرو وغاندي
ومش محتاج أقول انا كنت مين
أنا المصرى...كريم العنصرين؟
*******
وكان يخطب تصيب الدنيا ربكة
ومن لبنان يعود أسطول أمريكا
ولينا في الوجود كلمة ومكانة
وأخوة في الأمل ..دمعة وضحكة
ورقابينا الأبية... مرفوعين
أنا المصرى ..كريم العنصرين
*******
وجونا الى رمونا... للمهالك
تقول (لآه) يقولولها وانتى (وانتى
مالك)؟
تقول (لبنان.. أحبابنا الأعزة..)
يقولو (يغورو ...وتغورو كذالك)
نسيت من همى أبقى أزاى حزين
انا المصري ...كريم العنصرين
******
وبعنا كل شيء ينباع ... بدقة
بشفافية ومن غير أى سرقة
ونظرنا لعلم النهب ...صرنا
بننهب كل شيء ..لاكن برقة
بقينا دكاترة وسط النشالين
أنا المصرى ...كريم العنصرين
*******
زمان كان فيه ملك فاحت روايحه
وثوار وجيش بروحهم يومها ..
ضحوا
وكان لنا شأن حتى في الهزيمة
وطن كان يعجبك جمعه وطرحه
علينا العين... وباقى الامة عين
انا المصرى .. كريم العنصرين
*******
وعاد من تانى الملك يحكم بلاده..
ومن بعد السنين دى .. ذاد فساده
وكنا سادة فوق أرض الكنانة
وأصبحنا عبيده أو عباده
وضــــاع في الزحمة مشاور السنين
أنا المصري...كريم العنصرين
******
وتــــانى يا الفقير عاد من يخونك
وتتهان في بلادك وعينى عينك
ولا الدين مكتفى من مص دمك
ولا عارف ديونهم من ديونك
وجيت للحق؟..كله سلف ودين
انا المصري...كريم العنصرين
*******
ده يسلم لده والعصر فاجر
وتاجر حنت...سلمنا لتاجر
وأم الأمة مصر الانسانية
بتتأمر وبتدارى الخناجر
وكنت النجدة وأستنجد بمين
أنا المصرى...كريم العنصرين
******
وكنت أصرخ....وكان الكل يسمع
وأمد الايد...عدو ألأمة يرجع
وجانى يأمرنى ويشخط
وخلانى بقيت في الحق أنطع
أنا الى كنت أصحي الغفلانين
أنا المصرى ... كريم العنصرين
*******
وكانو يقولو (مــصــر) الشمس تطلع
وتعلا رقابينا فوق...وعيونا تلمع
وكنا نشيل قلوبنا فوق كفوفنا
وبصدورنا نواجه أى مدفع
فمين ساعدنا على الموضع المهين..؟
أنا المصرى ... كريم العنصرين
*******
وأزاى النهاردة الدم.. عومى
مقلقل صحوتى وساكن في نومى
مانا بتشتعل في أرض غزة
ولبنان... نارها ماسكة في هدومى
وأنا اللى في الاسى واقف ما بين !!
أنا المصرى ... كريم العنصرين
******
ولولا الأنظمة العربية لامت...
وفي صفوف العدو حتكون وكانت
ما كان الموت عرف (صيدا) و(بعبدا)
ولا كانت قيامة الغدر قامت
ولا قلب العرب بيت حزين
أنا المصرى... كريم العنصرين
*******
وشوف لبنان بترحل من جنوبها
ونوم اليل...ما بعرف جنوبها
سطور النمل زاحفة للملاجئ
وريح الخونه ما هدت هبوبها
ألوف راحلين في قلبى مزعورين!!
أنا المصرى...كريم العنصرين
*******
يا لبنان... أنا م اللى خنوك
يا حزب الله حـكامنا باعوك
يا صاحبى... ما عدنا نملك غير هتافنا
هتافنا مر ..مالى رقابنا شوك
وعلنى... بنفعل الفعل المشين !!
أنا المصرى ... كريم العنصرين
*******
يا (نـصـر الله) ده ... زمن البياعين
وأنت طلعت للأمة ...منين؟؟؟
تفكرنا بكل الى نسيناه
أظنه صعب يصحوا الميتين
وخليتناـــ الجميع ـــ متفرجين
أنا المصرى ... كريم العنصرين؟؟؟
*******
ما زال نفس العدو... وما زال خبيس
أبونا مات سبهولنا ... وريــث
ومهما يلف ويدور ... راح يغـــور
وأسأل عندنا بيوت السويس
حلاوة روح... وحياة الحسين!!
أنا المصري ... كريم العنصرين
*******
بقت رأيتك خلاص رمز لجهادك
بقت رمز المقاومة في بلادك
ولبنان كــلــهــا بايته في ضميرك
خلاص صبح الجهاد ماءك وزادك
لغير المسلمين والمسلمين
أنا المصرى ... كريم العنصرين
*******
بلاد أمريكان أحنا وصهاينة
وصمتى ع اللى حاصل ...كله معنى
ما زال الحلم لم يفارق دمايا
على الرغم اللى طعنة طعنة
يا لبنان الكرامة ....لا تلين
أنا المصرى ... كريم العنصرين
*******
ويا لبنان ما تطفيش نار نضالك
رجالك... حتى لو محناش رجالك
بحور الدم ما تغرق حقوقك
ولا تكسر مجاديف أحتمالك
حبيبك ... بس مش أقدر أعينك
أنا المصرى ... كريم العنصرين