الحلقة ((11 ))
*****
اصحا يا محمود
دا الخير موجود
و انت يا مسعود
قوم اتسحر
و انت يا حنان
يا وفاء يا إيمان
ادعي الرحمان
و اذكري اكتر
يا بخيت يا شريف
يا ابو دم خفيف
صحصح يا ظريف
و بلاش تخسر
يا سعاد يا ايناس
ما تصحو الناس
كيدو الوسواس
الله اكبر
ما تقوم يا صلاح
دا التقوي كفاح
و العلم نجاح
للكون نور
دا الأجر كبير
و الخير كتير
على فعل الخير
داوم و انشر
استطاع المصريون أن يحولوا المسحراتي لمهنة فنية تجمع بين الإلقاء الشعري و الموسيقى و بعضهم كانت لدية التلقائية و الارتجال في الغناء لتسحير الناس من خلال صياغة موال عن اسم صاحب المنزل او أسماء أطفاله و اشتهرت شخصية أبو كشك شاعر الربابة و استمعت إليه و لا يقل إبداعا عن جابر أبو حسين الذي خلده عبد الرحمن الابنودي في سيرته الهلالية و ..نستكمل غدا
يقول فؤاد حداد
يا حضرة الباشا فاكر
ياما سَحّرتك
و دمعى تحت القمر
بالليل مَسح حارتك
و قلتلك خلّى
قطفه لك و قطفه لى
و ربنا يخلّى
اطفالك و اطفالى
و لا كنت بتصّلى
يا باشا و لا بتصوم
غير كل حبه
على السبحه تقول مخصوم
و كنت يا باشا
ما بتسمعش بالعربي
حضروا اطبا يردوا
السمع و الطاعه
حضروا اطبا
يداووا نفْس طماعه
افتح يا سمسم جماعه
حضروا بسماعه
تكشف قلب سحارتك
*****
أبو مؤمن جوهر
نشرت فى 28 مايو 2019
بواسطة fnysong
عدد زيارات الموقع
10,946