مجلة بشرى الأدبية الأليكترونية - الشاعر الكبير / صائغ القوافي - قصيدة : ألف سؤال و سؤال

 الف سؤال وسؤال 




على قد سؤالهم الكتير عنك
وعن غيابك اللي عليا طال
بيزيد شوقي دايمآ لقربك 
وبيكبر بقلبي الف سؤال

بشتاق لوجودك كتير جمبي 
وبأشتاق قوي للمسة إيديك 
وحشاني منك كلمة يا قلبي 
ونظرة حب شفتها في عينيك

الف سؤال وسؤال بيحيرني 
إزاي قادر كده تغيب وتصبر
ليه بطلت كده تسأل عني
و إزاي بقيت ع الصبر تقدر

فين أشواقك بتاعت زمان
فين راح الحب منك فين
فين صوتك اللي كله حنان
وكلمة بحبك يا نور العين

مشتاقة لحضن قلبك
ومشتاقة لهمسة شفايفك 
دا القلب لسه عايش بحبك 
وفي غيابك بقى عليك خايف

طمني عليك ولو بكلمة
تريح قلبي من ظنونه 
رجعوا تاني لأعلى قمة
ريحوا ولو مرة من جنونه

خلي الفرح يدق بابه
وينور سكته من جديد
دنتا ياقلبي أغلى أحبابه 
وانت الهنا كله والعيد

إرحم صبري اللي طال
ودمع عيني في الليالي
نفسي أسألك الف سؤال
دايمآ بيجوا على بالي

بتحبني لسه و دايمآ على بالك
ولا إتغيرت ونسيت هوايا 
لسه قربي هو اللي بيحلالك 
ولا داه إحساس بس جوايا

ياريت تريحني مرة وتقول
غرامك زي ماهوه ولا إتغير
ولو كنت لسه وبيا مشغول
ليه سايب قلبي كده متحير






صائغ القوافي