محشور افندى الحشرى

انا محشور افندى الحشرى ابويا الاستاذ الحشرى العرضحالجى المعروف امام محكمة عابدين واللى كان مشهود له بالكفاءة فى اى موضوع يحط مناخيره فيه كان لازم يحيب اجله ايوه يجيب اجله متفهمونيش غلط يعنى يخلصه لانه كان بيحشر نفسه فى كل حاجة لغاية مالقاضى يطفش منه وكان نتيجة لكده كان معروف لانه كان يعديش اسبوع والا يكون واخد اسبوع سجن بسب انه بيحشر مناخيره فى اللى ملهوش فيه وهتقولوا انا ليه اسمى محشور هو ابوك محرمش من اسم الحشرى ارجع واقولكوا انه ليه حكاية مع امى علشان كده سمونى محشور اصل بسلامتها امى كانت مدمنة اكل الشطة السخنة الموهوجه وكانت على وش الولادة علشان تجيب انا بسلامتى فال ايه هى وفيها الوجع لقت دقة شطة سخنة  زغللت عينها ام انزلى كليها كلها المفجوعة وانا جوه مستحملتش الشطة فقلت الست دى مفترية وعايزة تتادب شوية فتحشرت خمس ايام مش عايز انزل علشان كده سممتنى المحشور عمركم شفته كده مش بقلكم انها ست مفترية بس هى مش هتجيبه من بره هى مش مرات الاستاذ الحشرى استنوا استنوا انا سامع صوت عالى وصراخ من الشقة اللى جنبنا لما اروح اشوف فى ايه اهو بردوا الناس لبعضها


ياترى محشور الحشرى هيعمل ايه ...ربنا يجيب العواقب سليمة



راح محشور الحشرى جرى على باب الشقة علشان يشوف فى ايه فى شقة الاسطى حسن وهو سامع صوت الست عليه وهى بتعمل وصلة ردح من القلبك يحبها والاسطى حسن يقولها اتلمى ياوليه لحسن اكسر عضمك
ومحشور يخبط على الباب وتفتح بنت الاسطى حسن الباب ليدخل محشور الحشرى محشور: ايه ياجماعة خير ده صوتكم موصل لاخر الشارع الاسطى حسن : اسكت ياحشور دى ولية عايزة قطم رقبتها محشور : لالا يا اسطى حسن انت اضربها بس علشان متتورطش الست علية: بتقول ايه ياراجل  على ورق محشور : عيب يا ست عليه ده الاسطى حسن راجل فلاتى لحسن يجيب واحدة تانية وتكبس على مراوحك الست عليه: يجيب... اش قدره بسلامته من برره هالله هالله ومن جوه يعلم الله اسئلونى انا الاسطى حسن: بتقولى ايه ياوليه هو لولايا انا  ما كنتى شفتى عدل يا شوكة فى بستان ورد محشور: لا ياعم حسن دى فله معطرة مراتك بس هى لسانها متبرى منها الاسطى حسن: فلة معطرة ايه  ده انت مغشوش فيها دى فى سوق الحريم متسواش تمن الست عليه: انا مسواش تمن ياراجل فى سوق الرجاله العشرة منك بربع
وهنا شاط الاسطى حسن ومسك العصا يجرى وراء الست عليه علشان يكسر عضمها وهو بيقول النهاردة اخر يوم ليكى ياتخينة ياعرة الحريم
لينسحب محشور بعد سخن المسائل بدل  ما يهديها وهو خارج سئل البنت هو فى ايه ردت البنت بتلقائية سيبك منهم دوا مجانين بيتخانقوا علشان اتاخرت فى عمل الاكل من الرغى فى التليفون
وعندما خرج محشور من عند الاسطى حسن سئله الجيران المتجمعين هو فى ايه رد محشور وقال سيبوه يا ادبها دى ست  غلويه بتحشر نفسها مع الجيران وتسلط الستات على اجوازهم
وتعالت اصوات الست عليه من الداخل بالصراخ من كتر الضرب وهى بتقول منك لله يا ابن الحشرى ولعتها نار ومشيت
ياترى هيسكت محشور الحشرى ولا لسه هيحشر نفسه تانى انتظرونا علشان نعرف
مشهد (2) دى مش جوازة المشهد يبدأ في شقة الأستاذ احمد حيت تتعالى أصوات الزغاريط  لتجذب انتباه الجيرا ليتدافعوا ليعرفوا ماهى اسباب هذه البهجة الموجودة عند الاستاذ احمد ليعرفوا ان عزة بنت الاستاذ احمد سوف تتزوج وان العريس مستعجل وهنا يظهر محشور افندى الذى حضر مسرعا ليسال قائلا محشور: خير هو فيه عندكم مين نجح وفين الحاجة الساقعة لحسن الواحد ريقه نشف من الجرى علشان يجئ يبارك الاستاذ احمد: الله يبارك فيك يا استاذ محشور وبعدين  ده فرح مش نجاح اصل عزة بنتى عقبال عند جالها عريس محشور : والله مبروك هو مين ده قوللى وانا خلال ساعة اجيبلك تفاصيل حياته بالكامل احنا عندنا كام عزة بس فين الحاجة الساقعة علشان ابر ريقى الاستاذ احمد: الحاجة الساقعة ياعزة لعمك محشور....بسرعة يابنتى عزة: وهى بتبرطم ببعض الكلمات هو ايه اللى جابه ربنا يستر الاستاذ احمد: اهى الحاجة الساقعة جت اتفضل يا محشور افندى محشور: مقلتليش هو مين العريس انا عايز اخدم والله لااكتر ولا اقل الاستاذ احمد: لا شكرا يا محشور افندى هو مش غريب ده ابن عمها ومعار فى الكويت اصله بيشتغل مدرس هناك محشور: اه ده منكم وعليكم ..خلاص خيرها فى غيرها احنا كنا عايزين نخدم والله يا استاذ احمد وخرج محشور بعد شرب الحاجة الساقعة وهو خارج رجع ليسال استاذ احمد محشور: مقولتليش هو بقاله كام سنه فى الكويت الاستاذ احمد : ليه يامحشور افندى محشور : ابدا بس علشان نطمن على بنتنا انها هتكون مرتاحة معاه زى هنا وميكنش ناقصها حاجة الاستاذ احمد: لا متخافش يامحشور افندى ده ابننا واحنا عارفينه
بعد مرور عدة ايام كان العريس وخاطيبته طالعين على السلم ليقابلوا الاستاذ محشور محشور: اهلا اهلا بالعرايس عاملين ايه بتتفسحوا مع بعض ولا عزة : اهلا عمو محشور محشور: خطيبك حلو ياعزة خلى بالك منه لحسن البت عايدة صحبتك تطلش منك اصل البت دى مصيبة عزة : لا متخافش ياعم محشور احمد مش بتاع الكلام ده محشور : طب سلام انا على العموم حذرتك علشان بعد كده متقوليش ياريت اللى جارى ماكان عزة : ايه الحظ ده ياعنى منرجعش الا لما نلاقى ابن الحشرى ده فى وشنا احمد : سيبك منه بعد عدة ايام تجرى حفلة الخطوبة ويكون مدعو فيها محشور افندى الحشرى الذى كان يتجول ويرحب بالمدعوين وكانه هو صاحب الفرح محشور: خدى يابت ياعايدة ايه الحلاوة دى يابت اللى يشوفك يقول انتى العروسة عايدة : ايه ده ياعم محشور انا العروسة محشور : ايوه هو انتى اقل منها ده بالعكس ده انتى اجمل واحسن منها بس هو الحظ عايدة : اهو انت قولتها محشور: يلا اسالى على النصيب وانت نصيبك مفروض يكون زى عزة واحسن الاستاذ احمد: اهلا يا محشور افندى منور الفرح والله محشور : ده منور بالعروسة والعريس بس خلى بالك من البنت البروية اللى اسمها عايدة لحسن البنت دى حقودة ومستكترة العريس على بنتك دى مش جوازة اللى تخلى النفوس كده وحشة بالشكل ده الاستاذ احمد: ياسيدى خليها على الله الى نصيب فى حاجة هيشوفها
ليترك محشور افندى يبرطم مع نفسه وكئن لسان حاله يقول هتم يعنى هتم غصبك عنك يامحشور





مشهد رقم (3)يخرب بيتك يابن الحشرى

خرج محشور افندى من بيته متوجها الى القهوة كعادته يوميا ليعرف اخبار الحارة عن كبيرها وصغيرها اصله ميجلهوش نوم من غير هذه العادة اليومية محشور: السلام عليكم يازباين الهنا ايه اخباركم حمص صبى القهوة: ازيك ياعم الححشرى فينك دى الامور مولعة نار محشور : فين ييومع مين حمص : الجزيرة بتقول التحرير مولع نار محشور : ومين ولعه ياض حمص : الشباب محشور: هو النهاردة مش عيد حبيب العادلى حمص : ايوه ماهى بتقول انهم اختاروا اليوم ده علشان عكننوا عليه محشور : هو المعلم سمعه فين حمص :  قاعد على البنك وجابلوه تليفزيون مخصوص غر بتاع الزباين محشور : طب جابلى قهوة على الرحة هناك المعلم سمعه: تعالى يامحشور دى الدنيا مكركبة فى التحرر واحنا نايمين فى العسل محشور: ليه يامعلم هو فيه ايه المعلم سمعه: العيال الثورجية نزلوا وعايزين يشيلوا وزير الداخلية والحكومة لانهم فاسدين محشور : والله معاهم حق يامعلم المعلم سمعه: بس لوحدهم مش هيقدروا لازم الناس كلها تتلم حواليهم زى زمان محشور : قصدك زى ثورة 19 يا معلم المعلم سمعه: ايوه يامحشور  لان لمت الناس بتخوف اى حد وبيعرف ان الموضوع مفهوش رجعه محشور : بس يعنى يا معلم هو العادلى ابن المفترية ده هيسيب حد ه اللى بيتلم عليه محدش بيعرف قراره فين المعلم سمعه : ربنا معاهم والله انا عايز اقفل القهوة والم الزباين واروح على هناك محشور : تروح فين يامعلم دول شوية عيال وشوية ميه هتجريهم المعلم سمعه : لا يا محشور المرة دى انا عندى احساس ان سنة 19 رجعت تانى والمصريين صحيوا من نومهم خلاص محشور : يامعلم سيبك من الكلام ده دول شوية عيال بتوع الجمعيات اللى بنسمع عنهم كل يوم بعملوا وقفة احتجاجية هو فى حد عبرهم قبل كده
وهنا ينحشر احد الشباب ليقول: بس الناس دى عندها حق فى اللى بتعملوا واحسن منا احنا اللى قاعدين بنلعب طاولة وبنتسلى والمفروض نكون معاهم هناك محشور : معاهم هناك نعمل ايه الشاب : احنا زيهم وز كل الشعب المطوحن  وطالع عينه محشور : دول شويه عيال مضحوك عليهم ودلوقتى الخرزان يشتغل والكل يجرى الشاب : دول مش عيال دو رجالة وارجل من حد فينا لانهم واجهوا ومخافوش من حد محشور : دول عيال ومحدش عرف يربيهم وهنا تشتد المناقشة بين محشور والشاب ليتهور محشور ليضرب الشاب بالقلم وهو بيقول وانت كمان محدش عرف يربيك ليشيط الشاب غضبا هو ومن معه ليحطموا القهوة ويكسروها على راس محشور ليخرج المعلم سمعه وكله حسرة على القهوة التى اتكسرت محتوياتها وهو بيقول روح منك لله يامحشور يابن الحشرى يخرب بيتك زى ماخربت بيتى