العشب طاطا للنسايم ونخ
اخضر طري مالهش في الحسن اخ
عصفور عبيط انا .. غاوي بهجة وغنا
ح انزل هنا .. وانشا لله يهبرني فخ
عجبي !!!!!!!!!
تسلم يا غصن الخوخ يا عود الحطب
بييجي الربيع تطلع زهورك عجب
وانا ليه بيمضي ربيع وبييجي ربيع
ولسه برضك قلبي حتة خشب
عجبي !!!!!!!!!
دخل الشتا وقفل البيبان ع البيوت
وجعل شعاع الشمس خيط عنكبوت
وحاجات كتير بتموت في ليل الشتا
لكن حاجات كتير بترفض تموت
عجبي !!!!!!!!!!
الدنيا من غير الربيع ميتة
ورقة شجر ضعفانة ومفتفتة
لا يا جدع غلطان تأمل وشوف
زهر الشتا طالع في عز الشتا
عجبي !!!!!!!!!!!!!
مرحب ربيع مرحب ربيع مرحبة
يا طفل يا للي ف دمي ناغا وحبا
علشان عيونك يا صغنن هويت
حتي ديدان الارض والاغربة
عجبي !!!!!!!!!
احب اعيش ولو في الغابات
اصحي كما ولدتني امي وابات
طائر .. حيوان ..حشرة .. بشر .. بس اعيش
محلا الحياة .. حتي في هيئة نبات
عجبي !!!!!!!!!
إنشد يا قلبي غنوتك للجمال
وارقص في صدري من اليمين للشمال
ماهوش بعيد تفضل لبكرة سعيد
ده كل يوم فيه الف الف احتمال
عجبي !!!!!!!!!!
ساحة النقاش