مساء الخير عليكم يا اخوانا . ياريت تسمعوا اخوكم شاهد العصر والزمان

والواقف في غيط ابويا الحاج عطوة  وفي نفس المكان  ، انا ياما مر علي حواديت من كل الاصحاب والجيران والنهاردة حاحكيلكم حكاية اخونا الحصاوي حمار عم ابو حسين .

كثير بنسمع الناس حدانا في الكفر تقول كلام كثير ، زي مثلا الكلب الوفي ، زي القطط تاكل وتنكر ، انت حمار يا ولا مبتفهمش والاخيرة دي هي حدوتتنا .

 ومربط الفرس ليه لان الحمار مظلوم من بني ادم دايما . من اللي قال انه مبيفهمش  ؟ والدليل حدوتة اخونا حسن ولد ابويا ابو حسين اللي راح الغيط راكب حماره المحمل بثلاث شوالات من التبن وهو فوق منهم وطول الطريق يزعق والحمار من كتر الحمل والضرب ينهق غير الكلمة المؤذية اياها انت حمار مبتفهمش .

وبعدين لما وصل الغيط ورفع حمولته جري الحمار وروح علي البيت الكبير لوحده . وناديت علي حسن وراهنته ان الحمار بيفهم . قام قال لي نقطنا يا اخويا بسكاتك ، اكيد انا الي كسبان الرهان ده من قبل ميبتدي .. قال بيفهم قال !!!!!!!!!!!!1

قلت له لو الحمار روح البيت يبقي بيفهم وعارف الطريق لكن لو مروحشي يبقي معاك الحق وكسبت الرهان .

ومكدبش خبر اصله بيني وبينكم خايف برضه من ضياعه وكلام ابويا الحاج ابو حسين ومش بعيد ينوله علقة من عصاية ابويا الحاج حسين  ، وراح يدور علي الحمار،  وقبل ما يوصل البيت شاف اخوه حسين راكب الحمار وراجع الغيط يقول له : انت فين الحاج كلفني ادور عليك بعد الحصاوي ما رجع البيت من غيرك .

عمنا حسن ضرب كف بكف وقال صحيح الحمير بتفهم .

وانتو ايه رايكم يا اخوانا بيفهم ولا مبيفهمش ..........بلاش تظلموه