يا مسحّراتى (شعر عاميه)
*********************
يا مسحّراتى ..
نشيدك هز وجدانى..
وخطفنى من عز نومى..
بلهفه صحّانى.
قلت ف نشيدك كلام..
له فى المعانى أصول.
لأجل النبى ياجدع ..
لتعيده من تانى.
ما انا أصلى شاعر..
بأقول الحكمه ف الموّال..
وبدوب فى لحن الغنا..
أو كلمه عجبانى.
يا مسحراتى.. بلادنا..
طال عليها النـّوم ..
سنين تجرّ ف سنين..
فى الذّل بتعانى.
راضيه بطعم الهوان..
بعد داللى كانت فيه..
والله بأوصف وأقول..
والكلمه وجعانى.
يامسحراتى .. تعالى..
معايا .. شدّ الصوت..
نصرخ .. نصحى البلاد..
نبنى مع البانى.
نزرع فى قلب الولاد..
نبته .. ونرويها..
ونجيب لقلب الصّبيه..
الفرح من تانى.
معتمد البقرى