• 1. 

• *** فُتِحَ المزاد ***
  ***************
  فُتِحَ المزاد ........
  والعرض لسه بيبتدي
  يا ابو الولاد قرَّب هنا
  يا ست خشي ومددي
  او عددي وعلي النواح
  اصل المزاد مش انتيكات
  ولا عقد فالصو والماظات
  ولا شمعدان فضة ونجف
  ولا فيه تُحّف .. يادي القرف
  ده مزادنا كله ع الشرف
  لما انحرف ما رضيش يبيع
  حبة كرامة جوه روحه عجّزت
  متشعلقة بتوب حلمها
  مستنية طلوع الصباح
  فُتِحَ المزاد .........
  على فرع ناشف من وطن
  سوِّس وصاب قلبه العطن
  حتى البدن بقى توب قديم
  لا يداري عِرض ويستره
  ولا حتى ينفع للكفن
  وبراح غيطانه الطيبين
  علشان غبي بقى مستباح
  بقى شيء ضعيف جوه الزمن
  زي الكفيف بيخوفه وبيرعبه
  وسط الخريف صوت النباح
  فُتِحَ المزاد .........
  والعرض قرب ينتهي
  مين اللي قال انا هشتري
  واخلق له من قلب الوجع
  حبة شعور تهديه حياة
  يا الف آه يا ادي الوطن
  ازاي ابيعك وانت اخر طوق نجاة
  يا مفرقين دم الوطن بايدين غبية
  خلصت خلاص كل الحجج
  والمسرحية بتنتهي بس القضية
  لما تبيعوه هتلاقوا فين عنه البديل
  لموا ف جراب الذكريات
  ايه يعني ايه كلمة وطن
  يومها اكيد راح تعرفوا
  كان قد ايه رخيص التمن

أعجبني