***شفت البطة ***
شفت البطه فى قلب الحته
بتلعب نطه
وشفت القط اللى بيتلون
فى عين البطه
خفت عليها ليلعب بيها
قلت انصحها لتبقى ف ورطه
***
قلت يابطه بلاش تنطيط
اوعى القط اللى اسمه عاتيت
قاعد ليكى تقولى عفريت
وبيرسم ميت خطه وخطه
***
قالت خطه لمين ياخويا انتا
انا جيبالو فطيره فى الشنطه
يجرى عليها يتلهى فيها
ياكل منها حته بحته
***
قلت يابطه اسمعى لكلامى
انا اعرف عاتيت دا حرامى
عينو عليكى بيلعب بيكى
وحيغريكى بلعبه اونطه
***
لكن البطه ماسمعت ليه
جابت ياما وحطت فيا
واللى انا خدتو ياعينى عليه
امشى بعيد روح نام واتغطه
***
فضل القط يفكر ليها
جاب لها صوره وبروزفيها
ويقول فيها اللى ماهوش ليها
ويحطلها رتوش ميت شرطه
***
فحر الحفره اللى بتغريها
لف خيوطه على رجليها
وقام على سهوه ياعينى عليها
شد خيوطه فراحت ساقطه
***
شفتوالبطه وشفتو خيبتها
صدقت ان الصوره صورتها
وكان اخرتها وكان نايبتها
كانت فى عين القط محطه
*******
القلم الحُر
عبدالله ابو النجا
شعراء الآحلام ونجوم الآقلام
تسجيل الدخول
ابحث
عدد زيارات الموقع