ساعة

لما بطلتي تزوريني ف المنام ٥-٤-٢٠١٦
لما بطلتي تزوريني ف المنام
قولت يمكن اللي عامل انه صاحبي
ابتدي يفتح كلام
وابتديتي تفكري وياه تعيشي
قولتي راجل والسلام
هو أغني مني .. ممكن
ولا أوسم مني .. يمكن
بس من امتي الرجولة بالوسامة والفلوس
الرجولة تحسي بيها لو اسيبك
والحياة تصبح كابوس
الرجولة يعني واحد يشتري خاطرك بروحه
كل همه يداوي جرحك
مش مهم تزيد جروحه
الرجولة مش وسامة او فلوس
الرجولة يعني واحد لجل خاطرك
فوق جحيم الكون يدوس
بس مش معقول اكون ليكي السند
وابقي الحماية
وانتي تيجي تهدديني
انك هتبقي مش معايا
ده اللي ساكنة جوة ف ضلوعي
وف عروقي الكرامة
واللي حاول انه يعند
او يفكر عني يبعد
يبقي يلا بالسلامة
قلبي حضنه زي جنة
ما تتوصفشي بالكلام
واللي يختار بعده عنها
قلبي بيفارق قوام
من غير عتاب من غير وداع من غير سلام
واما توحشني اللي غابت عن عنيا
ف المنام بلقاها لسه دايبة فيا
ترجع الفرحة اللي ضاعت
شوقها كله يبان ف مسكتها لايديا
كل يوم بستني انه يزورني طيفها
وادعي يجري بسرعة يومي
واحب نومي عشان بشوفها
واما بطلتي تزوريني ف المنام
بطلت افرح .. بطلت اضحك
بطلت انام. ...
خالد الأنصاري