( الدنيا بطبعها دواره )
الدنيا بطبعها دواره
فيها مكسب وخساره
في اللي بيحلم باوضتين
وغيره عايش ف عماره
واللي بينام علي فرش حرير
وكل شباك له ستاره
والغلبان مش لاقي توب
نايم ع الأرض وغطاه شيكاره
واللي مهموم بيشكي الفقر
عايش طول حياته محروم
حزين نايم مشغول البال
من كتر الفكر دماغه مفروم
واللي عامل نفسه طيب
وهو من جواه لائيم
يضحك ف الوشوش بالغش
غدار وضميره مش سليم
واللي عايش بيتعاطى السموم
وأكله تملي ليلاتى لحوم
وبدل العربيه عنده اتنين
ومفيش مره بات مهموم
واللي همه ديمآ جمع المال
وتملي يحبك للفلوس
مش فارق حرام من حلال
ولو خلصت عليك هيدوس
واللي بيغدر ملوش وعود
قلبه حجر مفهوش الخير
بطبعه خاين للعهود
عايش وميت فيه الضمير
واللي بياكل ف لحوم الناس
نازل تقطيع ولا المنشار
منزوع من قلبه الرحمه
ف المعامله مرار صبار
واللي تمللي تلاقيه معاك
يشاركك الهنا والسرور
ووقت الشده يهرب منك
ويسيبك وحدك مقهور
واللي بيلعب بالفلوس
ومكانه طربيزة قمار
وغيره بيتعب علشان يعيش
وشقيان ليل ويا نهار
الدنيا بطبعها دواره
فيها مكسب وخساره
☆☆☆☆☆☆☆☆☆☆☆؛
مبروك علوه
