• متخـافـش •
عُمرك حسيِّت ف مره بخوف؟؟
انك تخــاف من بكره ومن الظروف
وتحِس إنك أعمى مش قادر تشـوف
غلط أو صح حتى لو واضح ومكشوف ؟؟
-إسمع مِنِّي ..
أصل الخوف ده مرض بيعمـي
بيخليك مش عارف تقَرَّر وتِبنـي
ولا تزرَع زَرعه صح ف تِجنـــي
ولّما حد يقرَّب منك تقُولُّه سِيبني
ساعتها بتكون زي أرض بـُـــور
وبخوفك تبني حواليها ألف سور
- طَب أعمل إيه يعني لو خايف ومِحتار
هنسى يعني الخوف لو دُست عـــالزرار؟؟ 😏
- لأ طبعا.. بس الموضوع محتاج قـــرار
قرار انك تفكر صح وتكون جَريئ
ده خوفك وسط بحر يموتك غَريئ
متسيبش حاجه تعطلك في نص الطريق
خوفك ده شئ طبيعي لانك عايز تنجـــــح
بس اوعى يا بطل يشِدّك وف بحره تِسبـح
ماتستناش الحظ يجيلك أوالظروف تسمح
اشتغل و استعين بربك وتوكَّل عليـــــه
ولو نجاحك اتأخر شويه متسألش ليـه
و كل حاجه ليها وقتها المعروف
عمرك حسيت ف مره بخوف؟؟؟
إوعى تسمع لحد يقولك .. مافيش فايده يافندينــا
وخليك مؤمن بقدراتـــك .. سَفينتك تُوصل المينــــا
مين كان مصدَّق نـــوح .. لما كان بيصنَع سَفينــه؟
يارب امتى الفَـــــــرَج .. و إمتى السفينه تِجينــا؟
بالبعد عنك ياربي .. الخوف جـــوانا بقى مالينـا
و الفشل حوالينا بقى شئ مألوف
عمرك حسيت ف مره بخوف ؟؟؟؟؟
متخافش من حاجه ده كل شئ مكتـــوب
لو غلطت مره عادي ماهو كلنا مَعيــــوب
أصل الحياه .. يوم غالب ويوم مغلـــوب
وسيبك من كل حاجه تخوفـك أو تحبطـك
ربك كريم و ياما بعد الحزن فـرَّح قلــوب
بس انت إعمل اللي عليك وخليك معــــاه
وهيكرمك وتنجح و تبقى كمان محبـــوب
انسى بس الخوف والخير يكون مَجلــوب
